Aizawl; Assam Rifles-ten Aizawl laili an chhuahsan hun tur chu hriat theih a la ni lo tih Home Minister Lalchamliana chuan ZALEN a hrilh. Hetihlai hian tun dinhmunah sawrkar laipuia Ministry of Home Affairs (MHA) thu Mizoram sawrkarin a ngaichang mek nia thudawn a ni.

ZALEN zawhna chhangin home minister chuan Aizawl laili a awm, Assam Rifles-te chu sawrkar laipuiin an chhuah hun tur rawn ruatsak tawh mah se, tun dinhmunah chuan Aizawl laili an chhuahsan hun tur a la hriat loh thu sawiin, tun hnai khan Mizoram sawrkar aiawhten an insawn chhuahna tur, Zokhawsang an enfiah tih a sawi.

Hemi chungchangah hian Mizoram sawrkara Home Secretary H. Lalengmawia (IAS) pawhin AR insawn chhuah chu Mizoram sawrkarin a ngaih thutak thu leh MHA kaihhruaia AR-te insawn chhuahna tur ,Zokhawsang hmun enho leh meeting neih chungchangah MHA an ngaihchan mek thu ZALEN a hrilh.

Union Home Secretary Ajay Bhalla chuan AR insawn chhuahna tur a hmun a enho leh tul dangte sawiho tura June, 2022 chhunga Mizorama MHA-a Addl. Secretary tirh a nih tur thu a sawi chu eng emaw harsatna vanga a rawn kal tak loh thu sawi bawkin, union home secretary hnenah hriat nawntirna an thawn tawh thu te, chu chu an la ngaihchan mek thu te a sawi bawk.

AR-ten chhuanlam hrang hrang an neih thinah pawh Mizoram sawrkarin hma an lak thu MHA hotute hnenah an thlen tih sawi bawkin, H. Lalengmawia chuan,  “Kumin May 24 khan Dy. Chief Minister Pu Tawnluia pawhin tun thlenga AR-te an la insawn chhuak lo chu pawm thiam harsa an tih thu union home secretary hnenah a thlen,” a ti bawk.

H. Lalengmawia sawi danin AR-te insawn chhuahna tur, Zokhawsang chu peih fel a ni thawkhat tawh a, Mizoram sawrkar pawhin a tih tur chinah theihtawp chhuaha thawkin MHA-in Zokhawsang hmun buatsaih tur a a rawih contractor-te pawh nawr reng an ni.