ZALEN November 1, 2024 : MPCC President Lal Thanzara chuan Assam Rifles nena Mizoram sawrkar inremna ziah chu fuh tawk lova a hriat thu a sawi a, Home Ministry hnuaia awm AR ten Chief Minister chan GAD inremna an ziahpui chu mak a tih thu a sawi.

Congress Party-in Congress Bhavan-ah ‘Friday Political Session’ an hmannaah MPCC President Lal Thanzara chuan, "Tunhnaiah Assam Riffles insawnchhuah tur chungchangah kan Chief Minister chuan Chanchinbu mi te hmaah a sawi a. AR te hi Congress sawrkar lai khan Prime Minister Rajiv Gandhi chuan an insawnchhuah tur thu a lo puang tawh a, Congress sawrkar pawhin a bawhzui zel a ni. Vawiin ni ah kan sawrkar pawh hian a bawhzui a, AR hotute leh GAD, Chief Minister chan Department a mi ten inremna hi an sign niin a lang,"

"April ni 1, 2025-ah hian an chhuak dawn niin an sawi a ni. AR te hi Home Ministry hnuaia awm an ni a, chuvangin Home Department hi a meizang hlaptu tur an ni. He thilah hian Home Department-a an officer te chu an hawihai hle a, sawi tur pawh an hre lo a ni. Enchhin Court ah hian Home Department leh Chief Minister Department hi an inkhel emaw tih mai tur a ni," a ti.

Health Care chungchang sawiin Lal Thanzara chuan, "Health Minister Lalrinpuii hian Press Conference ah Mizoram sawrkarin Universal Health Care scheme, cashless-in kum khatah nuaih nga zel hman theih tur chu August 2024 atanga hman tan anih tur thu te a sawi a, party office-ah leh Lawngtlai-ah pawh a puang a ni. Concern Minister ten an puan hi chu thudik ngei ni tura ngaih a ni a, mahse vawiin ni ah chuan Health Care cheng nuaih khat a inziahluh tur an ti leh a, a lungchhiatthlak hle a ni," a ti.