Aizawl March 17, 2024 : Aizawla Assam Rifles luah ram chhungah LSC nei mi 61 an awm a, chung zinga mi 13-ten an LSC an surrender tawh a. La surrender lote pawh sawrkarin thil awm dan a sawipui chho zel dawn.

ZALEN thudawn danin Lammual field awmna, Assam Rifles barrack pui ber awmnaah LSC nei mi 54 an awm a, LSC nei sawrkara in-report lo an nih avangin an LSC an surrender anga ngaih a ni bawk a, hemi nen hian tun thlenga LSC surrender tawh zat chu mi 16 anga ngaih a ni.

Assam Rifles ram luah zinga LSC nei surrender tawhte hnenah hian sawrkarin lawmthu sawina ziakin a pe vek dawn a, hetihlai hian la surrender lote pawh sawrkar aiawhten thil awm dan sawipuiin an la kawm vek dawn nia thudawn a ni.

ZALEN thudawn danin Assam Rifles ram luah zawng zawng chhunga LSC neite chu Commandant Bungalow area-ah mi pali, MC. Donald Hill area-ah mi pathum leh main barrack area-ah mi 54, an vaiin mi 61 an ni a. AR ram chhunga LSC neite chungchangah hian Central YMA chuan PIL case an lo file tawh.

Hetihlai hian Union Home Minister Amit Shah chuan April 1, 2023 khan Assam Rifles-te Zokhawsanga an insawnna tur a lo hawng tawh a, hemi tuma thu a sawiah Shah chuan, “Assam Rifles hi an insawn ngei dawn a, tuna an awmna hmun hi Aizawl tan hmun pawimawh a nih angin tangkai taka hman zui zel a ni dawn a ni,” tiin a sawi.