New Zealand Labour MP Chris Hipkins chu Jacinda Ardern-i thlaka prime minister ni tur a nih hmel ta a, an party hruaitute chuan amah chauh thlaktu atan hian an vawrh chhuak a ni.

Hipkins-a hi kum 2008 khan a vawi khat nan parliament-a thu pha tura thlan a ni a, November, 2020 khan Covid-19 minister atan ruat a ni.

Ardern-i hian Ningani khan prime minister atanga a bân tur thu hi a puang thut.

Kum 44 mi, Hipkins-a hi police, education leh public service minister a ni mek.

Prime minister ni tur chuan Pathianni hian House of Representatives-ah Labour Party-in an hruaitu atan an thlan a ngai.

Prime minister atana thlawptu a neih that tawk chuan Ardern-i pawhin governor-general hnenah a bânna a thehlut zui ang a, ani hian King Charles III aiawhin Hipkins-a chu prime minister atan a ruat zui dawn a ni.

Labour hruaitu thar tur hian hmabak a ngah dawn hle a, a hna hmasa ber tur chu inthlanpui lo awm tura tling leh tura hmalak a ni ang.

Ardern-i kaihhruaina hnuaiah khan thil man a sangin intluktlan lohna a nasa a, hei hi mipuia a tlak nat loh telh telh chhan pawh a ni.