Pastor George Thomas-a, New England khaw te taktea pastor hi a awm a. 

Easter Sunday tum khat chu Biak inah sava bawm hlui tawh tak, sawi bim bem leh tuiek deuh that tawh hi a rawn keng a, pulpit sirah a hung a. Inkhawm ho chuan makti takin an en a, a chhanna niawm takin heti hian a sawi zui a....

Niminah kawtthlera ka kal laiin mipa naupang pakhat a sava bawm khaia lo kal ka tawk a. Bawmah chuan sava te reuh te te pathum hi, khawvawt leh hlauhthawn vanga khur beuh beuhin an awm nghe nghe a. Chu mipa naupang chu ti dingin, "Bawiha i bawm khaiah hian eng nge awm le?" tiin ka zawt a. 

"Sava pathum mai mai mawle," 

"Enga tan nge i tih a?" 

"Inah ka hawn ang a, intihhlim nan ka hmang dawn. Ka chhaih ang a, an insual phahna turin an hmul te ka pawhthlak sak ang, a nuam dawn asin aw..."

"Rei loteah i ning thuai ang a, engtin nge i tih zel tak ang?"

"Zawhte ka nei alawm, sava te chu an duh lutuk, ka pe vek mai ang"

Pastor chu a ngawi vang vang a, "Bawiha savate hi cheng engzatin nge i hralh phal?"Mak ti hmel takin, "Ka pu, engati maw? savate hi i duh lovang. Lova sava satliah mai mai an nih hi, an nalh lova, an hram a mawi hek lo"

"Engzat nge i chhiar dawn" tiin a zawt leh a.

Mipa naupang chuan Pastor chu a thlek vang vang a, "Rs. 10 a ni mai" tiin a chhang a.

Pastor chuan a ipte a zen a, Rs. 10 tlang phawrhin mipa naupang chu a pe a, a kal bo ta nghal a. 

Pastor chuan sava bawm chu lain dimtein a khai a, kawtthler tawpa thing leh phul awmna hmun lamah chuan a kal pui ta a ni. Leiah a han nghat a, a kawngkhar chu hawngin a beng kerh kerh a, savate chu a chhuah zalen ta a. 

Hei hi sava bawm ruak pulpit sira inhung sawifiahna chu a ni. Pastor chuan heti hian a sawi zui a.

Nikhat chu setana leh Isua hi an inbia a. Setana chu Eden huan atangin a lo kal a, chapo leh thei inti zetin a tawng a. "Aw, ka pu, khu khawvelah khuan mihring tam tak an awm a, chaw chah itawm tak nen thang min kam tir la, an hnar phal dawn lo tih ka chiang, an zavaiin ka hui vek ang" a ti a. 

Isuan, "Engatan nge anni ho chu i tih?" 
    
"Intihhlim nan ka hmang ang. Inneih dan ka zirtir ang a, inthen leh dan nen, inhuat a inhauh dan ka zirtir bawk ang. Zu in, mei zuk leh anchhe inlawh tawn dan ka zirtir tel bawk dawn a ni. Silai leh bomb siam chhuah dan ka thiam tir ang a, anmahni leh anmahni an intihlum pheng phung mai dawn a ni. A nuam dawn lutuk." 

Isuan, "A nih leh chumi hnuah chuan engtin nge i tih zel ang?" 

Thei inti fe a nui chungin, "Ka ti hlum vek ang". Isuan, "Anni ho tlanna tur chuan engzat nge i phut ang le?"

"Engatan mah i ti lovang. Mi tha an awm lo. A chhan chu, i ta ni mah se, an haw ngei ang che. Chil an chhak ang che nga, anchhe lawhin an tihlum ngei ang che. I duh dawn lo tih ka hria."

Isuan, "Engzat chu nge i chhiar dawn? "Setana chuan nuihsawh hmela en chungin, "I thisen, i mittui leh i nunna"

Isuan, "Ni rawh se" tiin a chhang a.

A man chu a pe tla ta a. Pastor chuan sava bawm ruak chu a khai a, pulpit atang chuan a chhuk ta a ni.

Tichuan, Easter Sunday hi kan lo nei ta a.