April thla kum 1953 khan India Prime Minister Pu Jawahar Lal Nehru-a Aizawl-ah a lo zin a. Tlaiah Aizawl a lo lut a. Chu ni chu Nilaithawhtanni a ni a. Chutihlaia autonomous district council CEM chu Pu Lasawia a ni. Pu Lalsawia, CEM chuan a tuk Zirtawpni chu Kristiante ni serh Good Friday a nih avangin mi pawimawh interview tur te tan a lo thlen zan chuan interview hun a siam a. zanlai dar 1 thlengin interview-na hun chu a siam ta a ni.

Chutihlai chuan Silchar-aizawl kawngah hian jeep a lut hram hram theih chauh a. Kawng pawh la chhe tak a ni. Prime Minister Nehru-a putar tawh si kawng chhe taka nilenga insawhchho dawt dawt a a rinawm a ni. A zan a zana interview han lak nghal chu a chau hle ang. Hahthlak a tih zia pawh a sawi chhuak hial a, Pu Nehrua-a tlawmngaihna kha a fakawm hle mai.

Tin, Mizoram CEM-in Good Friday dawn a nih vanga sakhaw ni serh heti tak maia a ngaipawimawh a, PM meuh pawh lo kal se Good Friday ni bawhchhiat mai mai a duh lohzia a lantir ngam hi Pu Lalsawia CEM a fakawm tak zet bawk a ni.

Pu Nehru-a chuan CEM hnenah chuan, "Mizoram boss i ni a, in ram hian eng nge a mawh ber? tiin a zawt thut mai a. Pu Lalsawia chuan kan mamawh ber min hriatsaktu kan mamawh ber a ni," tiin a chhang nghal vat a. Pu Nehru-a chuan mak tiin CEM chu en ha mai a. Mizoram CEM chu pianpui politician a niin, intelligence a nei tha tih a hmu nghal mai a. CEM thuthlen te pawh a ngaihtuah uluk em em a ni, an ti.

April 3, 1953 chuan Reid House (Pawnpuite In)-ah district council member te hmaa thu ropui tak mai a sawi ta a, Reid House hi tuna Aizawl Tennis Court chhak building that awmna hmunah hian a awm a ni. Chuta Pu Nehru-a thusawi tlangpuite hi keini thangtharte tan hriat a pawimawh em a. I han sawi teh ang.

"In hnea ka lo kal thei leh thuchah ka sawi thei hi ka lawm hle. Ka la cham rei lo hle a, mamawh zualte erawh chu ka hriatpui mai the che u a ni. Kawngpui tha te, thawlhna tumhmun te, damdawi in tha zawk te, tui in tur hnianghnar zawk te, lo neih dan thar tha zawk te in mamawh hle a ni.

"India ram hmun dangah te ngahtuah chu inhnufual lo. Lehkhathiam hna thawh tur hmu lo in la buaipui ve lo hi in vannei hle mai. Zirna hi a tha lo ka ti hauh lo va, amaherawhchu lehkhathiam hna nei lo tam lutuk dinhmuna in luh loh hram ka duh a ni.

"Kut hnathawh in uar a, hei hi uar zel rawh u. In hma a thil tih tur reng rengah kum 5 bi te, kum 10 bi te-a plan siam thiam a ngai. Second Year Plan kan ti thin a ni.

"Sawrkar hnathawh ringawt hi uar suh u. Mahnia thil dehchhuaha intodelh hi nasa takin a hlu zawk a ni. sawrkar rinchhan lova mahni kut leh kea din hi in inzirtir nasat chuan hnam dingchhuak, ram vannei in ni ang a. In thangthar zelte tan rohlu a tling dawn tih hre reng ang che u."

Pu Nehru-a hian district council member ho leh mipui te hmaa rotling thudik a dah a ni. Awle, heng thu te atang hian sawi duh ka nei a. Chu chu hnam anga Zofate nun zirchian hi a ni. Tun lai hian sawrkar kan rinchhan lutuk a, mimal leh chhungkuaah te, khawtlangah te leh kohhran thleng hian mahni thawhchhuah loh sawrkara intun nun kan uar lutuk hi a ni. hei hi hnam kalsualna bul a ni.

Pu Nehru-a India zalenna sual chhuaktu chuan, "Mahni hnam dan hlohva hnamdangte tihdan lalut mi chu mi boral let der a ni a. Khawvelah hian dinchhuah theih tawh lohna khuarkhurumah a tla hlum a ni," a lo ti a. Hetiang hi Zofate zingah kan tam ta. Ka khawlaia advertisement tarah te hian kan mizo hmel a lang lo. Hnamdangte hmel kan tar tam lutuk. Mizo Nula/ tlangval hmeltha tak takte lemziah tar ve mai awm tak. Hnamdangte hmel kan ngaina ta lutuk te hi thinlunga inchiamralna chiah a ni. Tokyo-ah te, Beijing-ah te leh khawpui dangah te hnam dangte thla leh lemziak advertisement atan tar ta ila, ni khat bak a intar  lo ang. A tartu nunna thlengin a hlauhawm nghal ang. Chutiang chu mite awmdan leh zei zia chu a ni zawk.

Sawtkar hnaah te, kan eizawn danah te, kan sakhuaah te leh politic thlengin kan hnam nunphung rem zela tih tur a ni. Chutiang chu a tlo va hnam anga dinchhuahna thuruk a ni. Assamese te hi hnama an harhchhuah hlim khan an thupui chu 'Save Assam Today, Save India Tomorrow' (Assam chhanhim phawt la, zawi muangin India chu ila chhanhim dawn nia) a ni. Hetiang rilru leh thinlung hi Zofa te hian kan put a ngai ta takzet a ni.

Hnam chhanhimnaa kan harh that hi a ngai a. sawrkar hnathawk hi an kalsual mek a, NGO ho thlengin kan kalsual mek a. Kohhran pawh a bang chuang lo. Hnam chhanhimnaah hian reformation /revolution lian tak Zofate zingah hian thleng se he hnam hi a dingchhuak ang a, rahbi dik a rap ang.