-Dikteii Hnamte

Ka khawi-lo kal chhuak tur hian upat alamah (naupan laia upa kan tih em em rual kha ka nih ve tawh avangin rual u zawkte zah tak chungin) ka hmaiah hian eng engemaw hi ka hnawih ve thla zen tawh a. Kan tleirawl tirh chhoh leh a hnu kum engemaw chen hnu pawha hmaiphih mai duhtawk thin khan kum upa deuh nia inhriat ve tak hnu hian thup duh ka ngah ta a ni ve ngei ang. Darthlalang hmaa han thut a, han inen vang vang pawh hian pawnlam lan dan hrim hrima lungawi riau chang nei thin mah ila, a tak, hmaiphih huna lo lang tur kha mitthlain a hmu tel lo thei lova, belhchian dawl lo lai chu rilruin a hre ru rauh rauh lo thei thin lo!   

Thla hmasa thla tawp lam khan Biakina pangpar khawi turin ka thiannu pakhat nen min ruat ve a, Inrinni ah pangpar mawi ka tih zet zet chu ka lei a, a rawng inchawhpawlh dan turte mitthla chungin chawhnu lamah chuan Biakin Vestry ah kan nau pakhat nen khawi turin kan chho va. Mawi kan tih ang thlapin kan khawi a, uluk takin kan en a, kan her a, kan siamrem a, lungsi takin Biakin chhung, pulpit hnuai, chairman sirah kan hung chhuak ta a (kan Biakin, Biakinpuiah hian pangpar khawi hi pulpit aia sang lova khawi chu duhthusam anih thu min hrilh thlap thin).

Kan dahchhuah hlim pawhin mawi ti takin kan thlek kan thlek a. Mahse kil hrang hrang atanga han enkual khan Vestry chhunga a mawi kan tih kha a phawk chhuak zo ta tlat lo mai a. Hla deuh atang phei chuan mawi tham lo leh thawl deuh riau te khan a lang ta tlat mai. A bul hnaia kalin a mawi ngaiin a mawi reng a, hla deuh atang chuan a mawi tham lem lo a ni ber mai. Hla deuh atanga mawi tur chuan phal chin bak deuha khawi emaw, a bulhnai tana hnawksak khawp emaw a khawi a ngaih tlat avangin belhchian (a bulhnai atangin) a dawl tho ve tiin kan lungawi lui ta ringawt ani ber mai.

Kau Tluangtea (Tluangte Hnamte) khan a kartin chanchinbu Lei HRINGNUN ah khan a phek tawp berah ‘Belhchian dawl lo’ huang kha a dah a, thu chi hrang hrang a ziah thin tam zawk kha chuan belhchian a van hlawh thin tak. Mi tamtak chuan belhchian dawl lo kha an belchiang chak ber tlat a, an fakin an sel a, an sawi zui nasa thin khawp mai.

Eng hi nge kan belhchian a, tu hi nge belhchian kan duh thin le? Eng rilru puin nge kan inbelhchian thin a, eng hmang hian nge belhchian dawl leh dawl lo hi kan teh thin?

Thup hram hram ka duh ka hmai bawl leh duk te hi min phih fai saka min en chet chet kher kha i duh em ni? I kianga lan mawi ka duh avanga ka thup hram hram hi i hmuha a mawi anih chuan mawilo a awm em tiin tui leh sahbawn nen min chang reng dawn em niang? Ka tha lo lai chu tuma hmuh loh, ka mut dawnah chauh ka lantir anih chuan i pawi a sawi phak lo thei mai lo maw?

Ralkhat atanga pangpar mawi i tih phak loh kha a bulhnai ami tan chuan a mawiin a rim pawh a tui em em tih hi i ngaihtuah tel ngai em? Nge, a belhchianna hmun, a bulhnaia kal peih chuang si lo khan i ralkhat sel mai zawk dawn? I duh ang thlap leh mawi i tih anga awm tura i beisei kha a bul hnaia awmte tana hnawk leh harsatna thlentu a lo ni thei leh tho asin.

‘Belhchian dawl lo’ kan tih kan tih hi kan belchiang chak tlat a. Mahni inbelchiang ngam chuang si lo hian mi hi kan kher neuh neuh thin a ni zawk awm asin.

Chhungkua, khawtlang, pawl, kohhran leh sawrkarah pawh a belhchian tlak lai leh a mawina leh tak/thatna hmu phaka hnaia awm tha duh chiah si lo hian ralkhat atangin kan beiin kan nek a, mahni rimtuina hloh thakin thlantui chhuakin kan nawr a, keimahni rim hi kan tichhe thin a lo ni.

Mimal emaw, chhungkua, pawl, kohhran leh sawrkar emaw pawh ni sela a belhchian dawlna lai atangin bel ila, midang hmuh loh tura a inthupna ang zawng zawng hlip thla a an chhiatna lai ber hailan kher tum lo hian hmalam pana kal turin rilru i siam ang u.

“Mi dem hman a ni ta lo ve, Ni a lo kiam sawt em e…..”