"Tin, ngai teh, lîr nasa takin a lo nghîng a; Lalpa vân tirhkoh vân ațangin a lo chhuk a, lung chu a rawn lum sawn a, a chungah a țhu ta a"(Matt. 28:2).

Kum 1975 daih tawh khan, Apollo 17 chu vân sangah kah chhuah a ni a. Mipui tamtakin a hmunah leh televisionah an lo thlîr a. A hun a lo thlen chuan second a inchhiar thla tiâl tiâl a: 10, 9, 8, 7, 6, 5, 4, 3, 3, 1, zero! Chu veleh êng nasa tak mai leh ri dup chu reilotê chhung takmeuh hmuh leh hriât theihin a awm a; chak lutuk maiin vâna arsite ang maiin a chhoh dêt zuai a, vân thengrengah, thim mup maiah chuan a bo ta a ni. Mitkhap kar lovah a zo dêr a. Hun rei tak chhung a thlâwk chhuak lai hmuh tuma lo nghâk tute tan chuan beisei ang a ni hauh lovang! A ințan a, a zo nghâl a! Apollo 17 Rocket kha hmuhtheih a ni lo; mahse dâwt pawh a ni lo; a chhungah khan mihring pawh an chuang ngei a ni!

Chutiang bawkin, kan Lalpa Isua kha thlân ațanga thâwklehkhata a lo tho chhuâk thut lai tak emaw, a rawn chhuak țiâm țiâm lai tak hmutu, phâwk tu an awmin a lang lo, tih hi ka rilruah a awm daih mai a! Mahse, a rawn tho chhuak lai tak an hmuh loh avang ngawt khan a tho lo tihna chu a ni hauh lo! A tho leh a ni, tih chu hai rual a ni lo tlat mai! Mak leh êm êm bawk chu, Bible in min hrilh danin, a thawhlehna hriatpuitu, (witness) kil tin ațangin aiawh, (representative) chi hrang țheuh an awm hi a ni a; inang lo pui pui vek an ni! 

A thawhlehna thu hretute (witnesses) chu hengte hi an ni: khawvêl innghahchhan ber kan leilung hian a hriâtpui phawt a, vân mipuite ai awhtu, ringhleltute ai awhtu, mihringte ai awhtu leh amah zuitute ai awhtu te an ni a: Hetiang­in-

1. Leilungin a tho leh a ni, tih a hriâtpui: Bible chuan, "Lîr nasa takin a nghîng a..." a ti a ni. Khawvêl innghahchhan ber, leilung pawhin a tho leh tih chu a hriâtpui chiang a ni.

2. Vân mipuite aiawhin vântirhkohvin a tho leh a ni, tih a hriâtpui: Lalpa Vântirhkoh khan lung a lum sawn khan, Lal Isua a lo chhuah theihna tûra lum sawn a nih hmêl loh. Thlân kha a ruak chiang a ni, tih Mari te pahnihin an hmuh ngei theihna tûra lum sawn a ni zâwk!

3. Ringhleltute aiawhin a vêngtu Sipaiten a tho leh a ni, tih an hriâtpui: A thawh leh an rin avanga a tho leh lai hmu châka thlân kha awmchilh an ni lova, a zirtîrten an rûkbo lohnana a thlân chu vêng an ni zâwk a. A vêngtute chu Amah an hlauh avângin an khûr a, mitthi ang maiin an lo awm ta a, tih kan hmu a ni (Matt. 28:4).

4. Mihringte aiawhin hmeichhe pahnihte khan a tho leh a ni, tih an hriâtpui: Ni sarihni hmasa ber ni tûra khua a vâr dâwnin, Mari Magdalini leh Mari dang chu thlân en tûrin an kal a. Thâwklehkhatah lîr a nghîng a, Lalpa Vântirhkoh rawn chhukin lung a lum sawn lai an hmu a. Lal Isua tho lai tak kha an hmu kher lova, Vântirhkoh zâwk khan, "Nangni chuan hlau suh u. Isua, an khenbeh kha in zawng tih ka hria e. Hetah a awm tawh lo ve. A sawi ang ngeiin a thawhleh tawh kha. A mutna hmun hi rawn en teh mah u," tiin a mutna hmun ruak a kawhhmuh chauh a; a tho leh a ni, tih an chiang ta êm êm a ni! (Matt. 28:5b-6).

5. A zuitute zîng ami ngei pawhin a tho leh a ni, tih an hriâtpui: Khua a la thim laiin, Simon Petera leh zirtîr pakhat chuan thlân thleng hmasa nih an inchuh a, an in tlân pêl nawk nawk a; an va thlen chuan, thlân chu a lo ruak a! A lua inhrûkna puan leh puan zai sînte chu ziâl sain hmun hranga awmin an va hmu a ni (Joh.20:3-7).

Mit ngeia va hmuh kher ngai lovin, kan mimal nun min khawih tawh țhin danah te hian, Lal Isua thawhlehna hi keimahni ah a chiang takmeuh em aw?

Kan lal Isua a lo kal leh hunah phei chuan, kan ai awhtute chauhin an hmu dâwn lova, Vân mipuite leh amah ring lo tute, amah zui tlat tute, lei mihring zawng zawng te - mit tinrêngin an hmu tawh dâwn a ni.

Isua thawhlehna hriâpuitu i ni em?