Major Reuben Lalnunthar Hnamte -

Khawvela kan awm chhung hian pawimawh ber nia kan hriat chu mi mal, chhungkua, khawtlang leh ramahte pawh sum hi a ni awm e. Sum pawimawhzia chu kan hre theuh a, tute mah hi a lovin kan awm thei hauh lo mai. Isua pawh khan a ngai pawimawh tho mai a; mahse, a dah pawimawh ber lo niin a lang; “Sum lemin thiante siam rawh u,” tih te kan hmu. Chhungkua zahawm leh hausa kan tehnaah pawh hian sum hian kawngro a tu viau mai a, ram hausa tehnaah phei chuan a ni lehzual a ni.

Khawi  ramah pawh ni se mi hausate hian thil an titheiin, ram thenkhatah phei chuan thilsual ti mah se, thiam loh an chang thei lo emaw tih mai tur a ni. An sum lakluh dan chu eng ang pawh nise, mi an hausak phawt chuan kan zahin kan tlawn duk emaw tih mai tur a ni. Kohhran te thleng hian mihausate chuan thil an ti thei emaw tih mai tur a ni a. Lal Isua chuan kan pawisa ang hi chu sum lem a ti mai a ni. A ngaiho hle tih kan hmu a, kumhlun tur a nih lohzia a hrechiang em a ni.

A lehlamah khawvela kan awm chhung hi chuan pawisa (sum) hian thil a tithei reng dawn a, a tangkai bawk a, tute pawh mai hian kan inchuh sup sup mai zawng a nih hi. Sum lakluhna a nih chuan a tha leh tha lo emaw, a thianghlim leh thianghlim loh lam emaw kan pawisa tawh lo. A tam thei ang ber lakluh hi mi tin mai hian kan duh a ni ber awm a sin. Mi tam ber tan chuan pawisa ngah apiang an hmeltha a, an fel a ni ngawt tawh mai a nih hi. Chu chu chhungkaw tin deuhthaw, khawtlang leh ram pawhin kan innghahna chu pawisa a ni lo thei lo. Chutih rual erawh chuan mi mal, chhungkua leh ramahte hian a berah sum (pawisa) hi kan nei ang tih a va hlauhawm ta em! Engnge kan ram hian kan inngahna ber ni ang le? Pawisa leh therhlo um reng reng hian kan phe suau suau mai em ni?              

Kan ram hian thianghlimna nun hi kan uar thar kan kenkawh a ngai a ni. Sum leh pai a ni emaw, hmeichhiat mipat emaw, mipat mipatna, hmeichhiat hmeichhiatna leh thil dangah pawh paih ngama thianghlimna nun hi kan uar thar a va tul em! Ringtu nun chu thihna atangin a intan ang hian thianghlimna pawh hi simna atang bawkin a intan a ni. Chutichuan chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u. Chhumpui nasa tak ang thlirtu chi hnih an awm: Van mi thianghlimte leh kan vela mihringpuite. Miten min chhiar, min thlir reng e! Tunlaia kan mamawh ber chu Mi Thianghlimte an ni (We need saints - Chick Yuil). Rawngbawltu ropui tak tak te, ram hruaitute leh mi ropui tak takte  tlakchhiatna tam ber chu an thianghlimna an  hloh vang a ni fo.

A pakhat lehah chuan kan ram hian pawn lam lang theiah pawha thianghlimna - zuk leh hmuam leh thil dangahte kan uar thar a ngai. India rama cancer tamna ber zinga kan han tel ringawt pawh hi thil zahthlak a ni. Kristian ram inti hial sia thianghlimna kan ngai pawimawh lo lutuk hi kan inenlet a pawimawh takzet a ni. Ringlo mi nia kan hriat kan ram min rawn tlawhtu ngeite pawhin Mizoram chu zuk leh hmuam kan ti nasa lutuk hi an vei hle zel a nih hi. Miin ruihhlo a tih tanna bul chu meizial zuk ruk atangin a intan daih tawh. Meizial emaw, sahdah emaw ti ngai miah lo zu ngawlvei, drugs ngawlvei an tam lo hle ang.

A pawimawh berah chuan kan ram min tidanglama, hmasawnna leh entawn tlaka min siam theitu leh kan inngahna ni tura ka duh chu  kan Pathian lehkhabu (Bible ) hi a ni. Pastor Rick Warren-a chuan Bible hi a lek kang a, “America hi ka tidanglam vek dawn,” a ti. Kan ram leh hnam, kan nun siam thatna atana hmanraw tha ber chu Bible hi a ni. Queen Victoria lal lai khan ni tla seng lohvah ro a rel a, an ropui hle. Mihang lal pakhatin Queen hnehah, “England ropuina chhan ber hi engnge ni?” tia a zawh chuan Lalnu chuan Bible hi a kawk a, “Hei vang hi a ni,” a ti. Kan ram hruaitute, kan politician-te pawh hian kan ram hruaina kawnga kan inngahna ber chu Bible hi lo ni se; tichuan, kan ram chu ram thianghlim leh intodelh, ramdangte tan pawha entawntlak kan ni thei ang.