Haukhuma Hauzel

Thuhma:

Tun atanga ni reilo teah Mizoram roreltu turte kan thlang leh dawn a, mipui aiawha roreltu tur kan thlanchhuah dik chuan kan ram a ding chhuak ang a, kan thlan fuh loh erawh chuan ram tlukchhiatna, mi pamham leh mahni hmasialnaa khatte rorelna hnuaiah Zoram mipui kan tlu lut vek dawn a ni tih hriain, kan duhthlanna chu fim taka hman a ngai a ni tih hre thar leh vek ang u.

Eng ang ram hruaitu nge kan mamawh?

State puitling kan nihna pawh kum 37 a lo ni ve ta reng mai a, hmasawnna eng eng emaw chu kan hmu ngei mai, mahse, mipui mamawh tak tak leh intodelhna chu kan la hlat hle si a ni. Hei vang hian kan ram hruaitute lakah mipui an beidawng hle niin a lang. Hmalam thirna tha tak (vision) te hi ram kalsiamah a pawimawh hle mai. “Inlarna a awm loh chuan mipui an tladah thin a, Dan zawmtu erawh chu an nihlawh thin” tiin Pathian thu chuan min hrilh “Where there is no vision, the people perish” tih hi a chiang deuh zawk awm e. Tun kum 30 chuang kalta a kan roreltute hian ‘vision’ tha an nei em? Anmahniin dan te an ngai pawimawhin mipuite pawh dan zawm turin an kaihruai em? tih te hi zawhna pawimawh tak a ni. State kan nih hnuin Congress leh MNF te’n Zoram rorelna an chang a, an ‘vision’ leh ‘dan’ an kengkawh nge kengkawhlo tih te tlem azawng tarlan a pawimawh a ni.

Congress NLUP kha :

Congress rorel chhunga an ‘vision’ pawimawh mipuiin kan hriat chian chu NLUP kha a ni ngei ang. New Land Use Policy, 1985-a an tan leh New Land Use Programme 2008-a an tan te a ni. A hmasa zawk hi chu a rei ta deuh a, a hnuhnung zawk hi han thlir zui deuh ila. January 19, 2017 a Kuthnathawkte Ni hmannaah khan khatih lai CM Lalthanhawla chuan “kuthnathawktute’n malsawmna leh eizawnna kawnga leirem an rah theihna tura duan NLUP-ah Pathian kut a lang” a ti a, “NLUP hi Pathian programme a ni” tite pawhin a sawi thin. NLUP Kutpui (Nov. 13, 2017) hmannaah pawh Pu Hawla chuan uar takin “NLUP hnuaiah tunlai khawvel mamawh chhanna a awm vek” a ti. Hetiang khawpa ‘scheme’ tha, ‘flagship project’ tih hial, mipui pawhin beiseina sang tak nena an lo thlir chu a ‘fail’ tih theih a ni a; CAG report (Report No.2 of 2017)-in a tarlan dan chuan, NLUP thil tum pawimawh thingtlang lo neih tihtawp, buh leh bala intodelh leh ram ngaw humhalh te chu a hlawhtling lo nasa hle! A ‘fail’ nachhan hi thil pahnihkhata sawifak theih a ni lo a, 1985-a an tan zawk NLUP hun laia tawngkam lar ve tak pakhat hriatchhuah a awl hle: “NLUP pawisa sem a han ni meuh chu, tape-recorder hralh a tla hle a, pa tamtakin an nupuite pawnfen an ‘present’ thei” tih kha!

SEDP ve thung :

MNF sorkar chuan a flagship project atan SEDP a duang chhuak a, an ‘term’ a tawp dawn tepa tih fel a nih avangin a dawngtute tan a hlawhtling dawn nge dawn lo sawi a harsa rih hle. Mi tamtak ngaihdan chuan a tira sawi cheng nuai 3 ni lo va, Rs. 25,000 emaw Rs. 50,000 emaw chauh sem chuan awmzia a neih vak a rinawm loh. Hei bakah CM-in nuai 3 pek vek tur tia uar taka a sawi laia tunhnaia Minister pakhatin “Nuai 3 kan tiam ngai lo” a tih leh he project kalpui a nih dawn lai vela a duangtuin “ SEDP hi ‘sem’ programme a ni lo” a tih te avangin MNF sorkar hi an ‘vision’-ah an chiang lo em ni? te pawh a tih theih awm e. Congress leh MNF te’n an ‘flagship project’ an kalpui dan hrim hrimah hian ‘system’ dik lo an hmang a, ‘official line’ pangngai ni lo, ‘ party line’ an chhawr a, hei hi Pu Zoramthanga, MNF President a nihna anga June 27,2018 a Mizoram Governor hnena ‘ complaint’ a theh luh ah khan a chiang hle ani. Chutichung chuan ama sorkar hnuaia SEDP sem a nih dawn khan an Block President te leh Unit hruaitute kha SEDP dawng tur te lo thlang fel turin amah ngeiin a hriattir leh si a ni! Party bil tana roreltute’n hma an la thin hi Zoram hmasawnna daltu lian tak a ni reng thin a ni.

Pu Zoramthanga ‘vision’ dang, Eden huan kha Horti. Deptt. intanna a ni a, kan ram economic system tidanglam tura hmanraw pawimawh ber a nih avanga he Department hi chelh chat a nih thu te, kum 10-ah chuan Mizoram chu ‘Switzerland of the East’ a nih theih dan 1998-a a sawi te, tunhnai deuh G-20 Conference-a khawvel ram hrang hrang mithiamte hma a Mizoram rua that zia, ‘income’ tamtak siam theitu ‘magic wand’ (dawivaih tiang) a nih dan a sawite pawh mipui bengah a la cham reng ang. A tak ramah erawh chuan Zoramin thawhchhuah a neih tlem zia, leiba ngah ber kan nih zia leh pawn lam atanga min hmutu, A Study of Finance (RBI) – 2023 in a tarlan anga Mizoram mi pakhat (per head) zelin Rs. 1,18,400 lai a ba mek tih te chu kan nihna dik tak a ni zawk si! Heti taka ram leilung tha, thlai leh thingrah that duhna, sik leh sa dik nei, ‘Pathian zawnchhuah ram’ ti a kan roreltuten an sawi rama awm kan ni chunga, ei leh bara kan intodelh loh zia chu Pu K Vanlalvena, M.P.(R.S.) in March 27, 2023-a Zonet-in an kawmnaa a thusawi khan a tichiang hle. Pu Vena chuan tihian a sawi, “Mizoram hi kan mamawh ngawih ngawih, nitin eitur pawh kan intodelh lo. Aizawl-ah hian thla thum chhung thlawhna leh motor lo lut lo se, pawn lam mi pakhat mahin kan mamawh lo thlen lo se, kan awmdan tur chu a ngaituahawm khawp ang.” Kum 25 kalta, December 8, 1998-a Pu Zorama’n Horti. Officer leh staff te hmaa an deptt. chu Zoram economic system tidanglam tura hmanraw pawimawh ber a nih thu a sawi te kha ‘vision’ dik lo a lo ni mai em ni?

Roreltute’n dan an pal zut :

Mizoram sorkar thiltih dan hrechiang tute chuan he ramah hian “Dan hi dan lo a ni a, Danlo hi dan a ni e” an lo ti hial! Restricted Tender te pawh PWD Code a kaihruaina ang ni loin, dan chu ‘kai lek’-in, duhsak zawngte uchuak taka vur nan hman a ni. Kan Sorkar hotu ber pawhin Finance Ministry atanga sum kan hmuh SASCI te SEDP fund leh a dang te pawh MLA bial vil nan hman a nih thu ualau takin 2023 kumthar party office hawnnaah a sawi chhuak a nih kha! Heng sumte hi MNF mi leh sate tan chauh ni lo, Zoram mipuite hmasawnna tur, Zofate’n kan la rulh leh tur a ni a, kan zavaia ta, kan phurrit a ni. Hetiang hma lakna hi Constitution Article 164(3) kalh tlat a ni. He Article hnuaia Third Schedule in a tarlan angina, CM leh Minister te chuan India dan zawng zawng te chu rinawm takin an zawm ang tiin Pathian hmingin chhia an chham a, an chhechham leh a taka an chetdan chu a in person hle! Kan Pathian thu erawh chuan ti hian a ti “Lalpa in Pathian chu Pathian ropui tak, tihbaiawm tak, tumah duhsak bik nei lo va, thamna pawh la ngai lo a ni si a” (Deuteronomy 10:17).

Machiavelli Doctrine chu :

Kan hriat angin Machiavelli (1469-1527) chu Italian political thinker leh author a ni a, a larna ber pawh lalna leh thuneihna nei tur chuan hmanrua engkim hman a thiang: ‘The end justify the means’ tih ngaihdan a zirtir hi a ni. Politics chuan a chhia leh tha a thliar lo. Adolf Hitler pawh khan “I want war. I don’t care the reason why” a ti tawp mai a ni awm e. Hetiang ngaihdan tihbaiawm tak hi tunlai ‘civilized world’ chuan a hnawl tawh.

Tuna Zoram dinhmun enge?

Mizoram veteran journalist H.C. Vanlalruata chuan Vanglaini-ah article, ‘Ram Hruaitu Hausa’ tih a ziak a kan ram dinhmun a tarlan hian Machiavelli ‘doctrine’-in a chhum hmin roreltu kan lo ngah ta hle em ni? tih ngaihdan a siam a ni. He article-ah hian Minister leh MLA te chu mimal hlawkna sumdawnna dang an khawih a thiang lo, chuti chung chuan tun inthlanna tura candidate hming pelut MLA nilai 38 zinga a tam ber hi an hauhsakna a pung nasa hle a, Minister pakhat chu kum 5 chhungin a hausakna hi nuai 600 chuangin a pung a ni! Hetiang hausakna lo pung thur thur hi kuhva ro tawlh rukna te, restricted tender leh dan kalh a chetnate avang a ni thei ang em? tih te chu ngaituahnaah a lut lo thei lo ani. A hma lama tarlan tawh angin, kan ram roreltute chuan thuneihna leh lalna an chan theih dawn phawt chuan dan leh ‘principles’ te chu sirah an hnawl thiam hle ani.

Hemi chungchang hi sawi tur dang tamtak a awm a, sawi sen leh sawi thiam tak tak pawh a harsa hle. Ka sawi fiah thiam aiin ‘Ka thianpa Partyruihchilha’ tih C. Lalbiaknunga’n chanchinbua a ziah kha a chiang viau in ka hria, tihian a ziak :“A nun zawng zawngah party thil a dah lian ber a, party dinchanna tur a nih phawt chuan dawt leh bumna pawh ni raw sek sek, a tan chuan hmanraw thianghlim a ni kumkhua mai a ni. A party dinchanna tur a nih phawt chuan hmanraw tawp leh tawrawt lutuk a awm theiin a hre lo a, hmingthatna aiin lalthutthleng a ngai pawimawh zawk.”

Kan ram roreltu thenkhat ten Machiavelli zirtirna lo pawmpui a, an nitin rorelnaa lo hmang thin te chu hriat chian theih a lo ni ta. He kan ram Pathian min pek tia kan sawi thin hi a lo dam a, hmasawnna chu a kal a kal mai lova, a zuana a zuan zawk theih nan, i duhthlanna chu fing tak leh huaisen takin siam fel rawh le.