Mizoram Inthlanpui 2023 vote chhiar ni tura ECI-in a ruat December ni 3 chu Pathianni a nih avangin Kohhran leh NGO lu a hai hle tih a hriat theih a. Inthlan puan a nih khan Inrinni emaw Pathianni emawah chuan vote chhiar lo hram tura ngenna lehkha pawh NGOCC atangin October ni 11-ah a lut a, MKHC, atangin vawi 3 thehluh a ni tawh a, MPF in vawi 2 an thehlut bawk a. Mizoram-a Election hotu CEO pawh an hmu zut a ni. Media lama kan lo hmuh ve phak tawkah vote chhiar ni ‘sawn mai thei’ tih a rawn ri phawt a. Hetiang a nih lai hian MKHC, NGO zawng zawng, MPF leh Political party-te inhmu­khawmin NGOCC kutah he thu hi dah a ni a. Chumi hnu reiloteah vote chhiar ni chu December ni 3, 2023 a nih tur thu kan hre zui leh a.

Tunah hian NGO Coordination Committee aiawhte chu Delhi ah chamin Election Commission of India-a an hotu ber Chief Election Commissioner chu Thawhlehni lo awm tur ni November ni 28, 2023 tlai dar 3-ah an thu ken an thlen dawn a ni.

Pathianni vote chhiar thuah hian sakhaw inneksakna thu a vir lian hle a. Sakhaw hminga ram lak chungchangah Muslim leh Kristian-te phei chuan nasa takin an bei tih a lang a. Hindu nationalist pawl an lo pawng leh a, ‘cultural nationalism’ tia vuah siin Hindutva Movement an kalpuia, hetia ‘majority’ an han che hi ‘minority’ tan chuan thil hlauhawm tak pawh ni thei niin a lang a. Hetiang boruak karah Kristian-te ni serh ber kher Pathianni-ah vote chhiar ECI-in a rawn ti ta mai si a. Kan ram, Mizoram-ah phei chuan kan hlau a, kan la na khawp a, him lo nia inhriatna a awm mek a ni.

2013 Inthlan khan MLA Inthlanpui vote chhiar kha Sabbath ni-ah a tla a, Synod khawmpui lai a lo ni lehzel a. NGO-te chuan Election lam nawrin vote chhiar hun chu an sawn tir thei ta a ni a. Tun tumah hian kan tapchhak atanga a lan dan chuan ECI hian a duh phawt chuan vote chhiar ni hi a sawn thei niin a lang a, December ni 3 a chhiar mai tawh tura ngaih November 28-a CEC an hmu thei chauh tur hian ngaih erawh a ti tha zan lo.

Pathianni-ah hian vote chhiar ngai ta pawh nise, Pathianni hi a tam zawk tan ‘Ni Serh’ a ni tih hria­in sahawk zawng emaw a mawi lo zawngin awm tum lo hram ila, insum a pawimawh lehtling zawk ang.

Pathianni-a vote chhiar tih hriat a nih tirh khan India Danpui-in sakhaw zalenna min pek inrahbehna niin ngaihdan lian sa deuh Mizo mipui nawlpuiin kan nei niin a lang a. Tunah chuan ngaihdan a inang lo tawh khawp mai. Pathian­ni-ah pawh zin vei vak an awm reng a, taxi a tlan a, a tul chuan hnathawk pawh a pisa kai loh theih loh tum a awma kan sel hran hleinem tihte pawh a ri bawk a.

Social media titi en hian ‘Pathiannia thil tha tih’ ti zawnga tanhmun khawh an awm ve bawk a. ‘Pathianni nilengin kan serh loa, chawhnu-ah phei chuan mitthi ral, thian emaw chhungte emaw tlawh kualin tam takin hun kan hman mek lawi bawk si a, vote chhiar turte’n chhiar sela, vote chhiar lo turte inkhawm sela a ni mai alawm, kum khata Pathianni vawi khat lo ui viau thu a awm em ni?’ tihte a ri bawk.

Eng pawh nise, vote thlak leh vote chhiar inkar hla deuh hi mipui lamin ning tawhin nih tur ang nih vat duhna avangin ngaihdan hi a phir a ni thei a.  Hemi ni lo hian Pathianni kan thlir dan leh nilenga kan hman duh dan chungchangah mipui ngaihdan pawh a inang tawh lo hle zawka, mipuiin an auchhuahpui theihna hmunah an sawi ngam tawh a, vote thlak leh vote chhiar inkar inhlat hi chu a nemnghettu chauh a ni ta mai em ni? a tih rum rum theih e.