Article : ZAWLNUAM SANGHA (Mana lei)
![](/storage/news/post/1MjEe5SQd37XhGTNYCL0eNpjA9bERjRtlkDukP6t.jpg)
Khawthlang lam kan zin tuma ka thil tawn atanga ka rilrua thil awm ka la ziah loh ka’n ziak leh ang e - ka rial deuh ta vang vang bawk a!
Zawlnuam college a hun hmang tur hian tun hnaiah tum hnih kan zin thla ta a. Khua a lum hle tih hi chu ka’n sawi duah lo phawt teh ang.
Zawlnuam zin hi chuan Sangha tharlam tak tak, te deuh leh lian deuh pawh, duh ang ang ei tur a awm reng ni maiin ka hria. Sangha ngaina tan chuan chawei tui loh ngaihna a awm lo a ni ber mai. Mikhual duhsak zawng min lo duatna a ni bawk nen, lawmawm ve tak chu a ni.
Kan zin hnuhnun ber tum, April thla pawh khan hetiang duhsakna hi kan dawng nasa hle. A hun hian a zir bawk a, kan thlennaah chuan power supply a awm loh zeuh pawhin kan mutui lai kan harh chawpchilh nghal zel kha a nia…..
College lam pana kan kal chuan kawngpui bul maiah dil kan hmu phei thluah mai a. Hnai-vai tak takah Sangha man tur kha a lo awm nual mai tih kan hmu a. Kan driver chuan, “Dil a lo awm hnaih hlawm em vang anih dawn hi thosi a tam em em!” a ti a, kan thlenna thlang maia Dil a awm thu leh zan lama pawna a thu thlan dai tur pawh thosi a tam avanga a awm rei theih loh thu a sawi zui a. Ka ngaihtuah zui leh pek a!
Sangha thar tui tak tak eitur leh duhsak zawngte hlui tur nei tur hian a man pek ngai hi a lo va tam dawn em! A Dil tur laih leh tha leh zung sen zawng zawng, a enkawl zuina atana senso, mi naran pawhina kan hriat ve thuak bakah hian man dang a lo la nei sang hle mai tih te ka chhut a. Tui tling, luang lovah thosi a pung duh tih chu mitinin kan hriat a nih laiin Sangha dil atan chuan tuitling ngei a ngai bawk si. Thosi seh te pawh chu Sangha ‘man’, keini ang mikhual, tuiti taka ei satliah ngawtin kan hriat ve phak loh a lo ni reng mai.
Hlawhtlinna engpawh nei tur hian tawrh tur hi a lo awm vek mai. Mi hlawhtlinna kan hriat ruala kan hriat riai ruai, mahse a tak taka kan hriatpui loh chu an tawrhna hi a ni ngei ang. Heta ‘tuar’ kan tih hi kan tehna azir erawh chuan a inang lo viau thei thung ang a, tawrhna ni lem lova ngai pawh kan awm ngei ang.
Hlawh tam, thawk tlem kan tih ngawt thin tamtak hian hlawh tam an neih hma hian engang taka harsatna leh mahni inthununna hahthlak tak nge an paltlang tih hi kan hmuh hmaih fo thin. “A zir zat hi zir ve ilang chuan anih ang hi ka ni ve thei,” ti thinte hian chu zirtu chuan engang hrehawm nge a tawrh kan ngaihtuah duh lo fo.
Motorin kan zin veivak a, tlai lamah feh hawng, thlai thar itawm tak tak phur kan hmu a, “in va awhawm em, in thar tha em mai, thlai tharlam deuh deuh in ei reng thei bik a” kan tih hian awhawm ni tura an thawh hah zia kan ngaihtuah zui ngai lem lo.
Mi hlawhtlingte thawh rah kan hmu a, kan hria a, chu hlawhtlinna hmu tura an kalkawng zawha harsatna awm thei ngaihtuah nachang kan hre lova, awmhmun atangin kan lo awt ve satliah thin.
Examnaa thataka pass tur hian thiante nena nuam tih zawng apiang ti ve lo tura mahni rilru inthunun a ngai a. Mi mut huna mut loh chang leh la mut chak em em chung pawha thawh hram hram a ngaih chang a tam em em a. Phone khawih te, games khelh te, dine out, movie, futsal te chak chung chunga tih loh ngam a ngai fo. Tunlai thalai zingah sawi ta ila, Social media laka inlak hran, thiante pawhin inchhuang an tih khawpa ngawih chuh a ngai thin. He’ng hi a ho lova, a hunlai ang zelin tawrh har ve tak an ni tih hi keini rual pawh hian kan hriat a tul hle.
Kut hnathawk hlawhtling hlei hlei hian hrehawm an tawrh kan hriatpui loh hi a va tam dawn tak em! Mahni tapchhak zawl atanga lo sawi mam ngawt chi a ni lo.
Zawlnuam Sangha thar, lian leh tui ei tur chuan ‘thosi’ a tel a ngai a. Rose par mawi tak thliak tur hian a hlingin min tai pilh a ngai ve tlat thin.
Kan chhandamna chauh hi “a thlawn” a kan chan theih awm chhun a ni a. Hei pawh hi man nei lo chu a ni bik hauh lova, a man min tlak saktu Isua Krista kan neih vang chauh a ni zawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024