K-Pop megastar BTS te chu IFPI Global Recording Artist Of The Year for 2021 atan thlan an ni a, he chawimawina dawng tur hian Taylor Swift leh Adele te an khum a ni. BTS hian 2020 khan he chawimawina hi an lo dawng tawh a, a kum zawnin an dawng ta a ni. 

BTS member - J-Hope, Jimin, Jin, Jungkook, RM, Suga leh V te hian an vanglai an hmang mek a, rimawi khawvel an chhiah hneh hle. Award eng emaw zat an dawng tawh a, record thahnem tak an siam tawh bawk. Hetiang a nih mek lai hian RM chuan, "Kum zawna IFPI Global Recording Artist Of The Year dawng thei hmasa ber kan ni hi kan lawm a, chawimawina ropui tak a ni," tiin a sawi. 

IFPI Global Recording Artist Of The Year  dawng thei nih hi a na mai lo hle - top 5-ah Taylor Swift, Adele, Drake leh Ed Sheeran te an lang a, The Weeknd, Billie Eilish, Justin Bieber leh Olivia Rodrigo te chu top 10-ah an lang bawk - heng zawng zawng hi BTS te hian an khum a ni. 
BTS hian tun hnai khan thu thar an nei bawk a, Las Vegas residency an nei dawn. Mipui 65,000 zet lenna Allegiant Stadium, Las Vegas-ah April 8, 9, 15 leh 16 khian show an nei dawn a, a tawp ni hian live-in an pechhuak dawn bawk. March 10, 12 leh 13 khian Seoul Olympic Stadium-ah homecoming show an nei dawn tih an lo puang tawh bawk.