Arunachal Pradesh-a Upper Siang district-a Zirtawpnia helicopter tlaa chuang sipai panga chu an thi vek a, Inrinni khan ruang hnuhnung ber pawh hmuh tawh a ni.

Air Traffic Control (ATC) chuan an tlak hma lawk hian ‘may day’ call an dawng a, a khalhtute emaw, khawl lam emaw fel lohna avanga tla ta nia an ngaih thu Indian Army chuan a sawi a. An tlak lai hian khua a thiang hle a, a khalhtute pawh tawnhriat nei ngah tawh an nih thu a sawi.

Hetih rual hian tlangram, tlangdung inkhawh kawkalh nuaihna lai hmun a nih bakah ramngaw a chhah hle a, tihsual palh awm thei niin an sawi.

‘May day’ call hi thlawhnaa thawktuten ATC emaw, lei lama awmte emaw hnenah an mangan thu an hrilh sawina a ni.

“Pilot-te hi darkar 600 chuang ve ve ALH-WSI khalh tawh, darkar 1,800 chuang service tling tawh an ni a. An thlawhna hi June, 2015 atanga thlawk tan a ni,” an ti.

Indian Army Aviation Advance Light Helicopter (Weapon Systems Integrated) hi Likabai, Assam-a awmhmun nei niin Zirtawpni tuk khan Migging khaw bulah a tla a. Ruang pali chu an chetsual niah hmuh nghal a ni.

An tlakna lai hi kawngpuiin a pawh lo va, van sang atanga zawn hmuh an ni a, a kang tih hriat takin a khu nasa hle.