Aizawl July 30, 2024 : Vawiin khan India ram hmun hrang hrangah Arvin Kejriwal, Delhi Chief Minister leh AAP Convener chu BJP sawrkar hnuaia dik lo taka man a nih avanga duh lohna leh lungawi lohna INDIA Alliance ten an buatsaih.

AAP Mizoram te pawhin hemi denchhen hian Mizoram mipuite hriatah BJP sawrkar thil tih dan hi an duh lohna lantirna atan Press Conference an ko a, a rang thei ang bera Arvind Kejriwal hi chhuah zalen turin BJP sawrkar an beisei a, an phút tlat tih thu an sawi.

AAP chuan, "Delhi Chief Minister ni lai mek Arvind Kejriwal hi BJP sawrkar hnuaia Agency hrang hrang chuan dik lo taka case siamsakin March 21, 2024 atang khan Jail-ah dah a ni a. Bail a nih lohna tura harsatna hrang hrang vawiin thlenga an siamsak reng hi hriatthiam har kan ti. Hetiang reng renga Opposition Party hruaitute, sawrkar Agency hmanga beih tawk hi India ramin zalenna a hmuh hnuah an la awm ngai lo va, hei hian kan ram democracy hruaia mi zalenna leh dikna chanvo BJP sawrkarin a ngaihpawimawh lohzia a tilang a ni," an ti.

"Agency te hian finfiahna (proof) engmah nei lo mah se, dan khirh tak PMLA Act an siam hmangin Arvind Kejriwal-a chu a hriselna pawhin tawrh phah hial khawpin tunah hian Jail-ah an khung mek a, Bail theihna beiseiawm a han awm deuh pawhin Agency dang ten a chhuah theih lohna case dang siamsaka an man nawn leh zel lai te hi hriatthiam har kan ti hle a ni. Kum hnih chuang an chhui tawh hnu pawha engmah chiang faka sawi tur leh man tur an nei lo chung pawh a, "a niin a lang" tih thu behchhana hren beh reng a ni hi India ram chhunga thleng atan kan duh loh berte zinga mi a ni. Arvind Kejriwal hi terrorist pawh a ni lo va, ram hmelma pa a ni hek lo! A tihsual lian ber chu, India ram khawpui ber Delhi-a mi narante tana zimain pek te, hospital tha leh changtlung zawk, mi narante tana a thlawna inentir theihna tur pek te Central Sawrkar ding lai, Modi-a kaihhruai thil tihsual leh tihdik loh na taka a dem hi a ni," an ti.

"Aam Aadmi Party chu kum rei lote chhunga Arvind Kejriwal-a kaihhruaina hnusia National Party a rawn ni thei leh a thang chak em em mai bawk si hi BJP hian an hmumawh a, he party chhiat vek leh ral theihna tur dapin Sawrkar thuneihna hmangin kawng chi tinrengin a bei ta niin a lang," an ti bawk.

" Vawiina Press mite hnena kan puan duh ber leh India leh Mizoram mipuiten lo hria se kan ber chu, dik lo taka BJP sawrkarin hun rei tak chhung Jail-a a tan tir mek Arvind Kejriwal rang takin chhuah zalen rawh se tih hi a ni," an ti.