Aizawl; Vawk natna hlauhawm tak African Swine Fever (ASF) lenna chhana ngaih, Mizoram state pawn atanga vawk la luttu chu chhui chhuah a la ni lo a, hetihlai hian March 21, 2021 hnu lama vawk thi avanga sum hloh (economic loss) chu cheng vbc. 120 vel a tling tawh nia ngaih a ni.

ZALEN zawhna chhangin ASF nodal officer Dr. Lalhmingthanga AH&Vety Joint Director (Livestock Health) chuan Mizorama ASF lenna chhana ngaih, state pawn atanga vawk laluttu chu chhui mek zel a la nih thu sawiin, ASF vanga vawk thihna hmasa ber Lungsen khua a investigation neih chu a report duhthu a la sam loh vang in chhuina report peih fel a la nih loh thu a sawi.

Dr. Lalhmingthanga sawi danin, March 21, 2021 atanga June 30, 2021 thlenga vawk thi avanga sum hloh chu cheng vbc. 117 vel ni a chhut a ni a, hetihlai hian tun July thla chhung in vawk thi engemawzah a awm belh leh tawh avangin vawk thi avanga hloh zat chu cheng vbc. 120 vel a tling tawh nia ngaih a ni.

AH&Vety department chuan ASF len chhana a mawhphurtu chhui chhuak turin Aizawl, Mamit, Serchhip, Lunglei leh Lawngtlai DC te a lo ngen tawh a, hei bakah hian police lamah pawh DIG kaih hruaina hnuaiah investigation team din a ni.

Kumin March 21 khan Lunglei district, Lungsen khuaah vawk a thi tan a, Mizorama vawk hri leng tawh thin a ni lo tih finfiah a nih hnuah April 5, 2021 khan Special Disease Investigation Team te Lungsen-ah an kal a, April 16, 2021 ah ASF vanga thi a ni tih finfiah a ni.

CB Piggery, Lengte chuan kuminah ASF vangin vawk 1360 vel an chan tawh a, chung zinga 350 chu a rai lai niin, a puitling 500 vel leh a bak zawng chu a note leh la puitling lo (talh rual la tling lo) an ni. CB Piggery neitu CB Khuma chuan ASF vanga an sum hloh tawh zawng zawng chu a tlem thei ang bera chhutin cheng nuai 380 vel a tling tih ZALEN a hrilh. CB. Piggery hi mimal anga ASF tuar nasa ber ni a hriat an ni. Mizoram ah ASF vangin vawk 17,000 vel an thi tawh a, ASF hi Mizoram district tinah hmuh a ni tawh.