Aizawl April 28, 2024 : Vawk pul hri, African Swine Fever (ASF) chuan Mizoram district thenkhat a tuam leh tawh a, Animal Husbandry & Veterinary (AH&Vety) department chuan ASF leng hi kum tin a zia chho telh telh turah an beisei tih an sawi. Hetihlai hian ASF vangin tunlai hian mahni vawk vulh talh/ser an tam hle.

ZALEN thudawn danin, ASF hian kum 2021-ah Mizoram a luhchilh tan a, he natna hian state chhung a chenchilh tawh a; amaherawhchu, hri len hmasak ber ai chuan vawk thi leh suatte pawh a tlem chho tial tial.

Hmun thenkhatah hri hi a lan chhuah leh thin avangin ranvulhtute tawrhna a thleng thin a ni.

Kum 2021-a ASF leng nemngheh a nih hnuah reh tak tak thei lovin kum 2022, 2023 leh 2024-ah te pawh report a awm chho zel a. Tun hnai a leng thar anga lang hi May, 2023 atang khan thla tin thi report a awm chhunzawm zel tih vety dept. hotute chuan an sawi.

ASF hi a enkawlna damdawi a awm loh avangin fimkhur chu invenna tha ber a ni a, ran in intlawhpawh loh, ran damlo leh sate zawrh chhuah loh, ran thite thuk taka phum that, ran in leh a vel damdawi nen a tihthianghlim fo tur a ni.

Hriat theih chinah ASF hi Aizawl, Champhai leh Saitualah te a leng tih nemngheh tawh a ni a, tun hnaiah vawk 300 dawn a thia report a ni tawh.

ASF leng mek vangin tunlai hian hmun hrang hrangah mahni vawk vulh lai talh/ser an tam chho mek a, chung mite chuan an hlauhthawn thilah leh invenna atan an vawk vulhte an talh tih ZALEN an hrilh.