India chuan Asian Games 2023 ni khatna chu medal panga - silver pathum leh bronze pahnih lain a khar.

Ashi Chouksey, Mehuli Ghosh leh Ramita te telna, women’s 10m air rifle team chuan Hangzhou 2023-a India medal hmasa ber lain silver an kap chhuak a. Ramita-i hian individual event-ah bronze medal a kap chhuak bawk.

Rowing-ah men’s lightweight double sculls leh men’s eight teams chuan silver medal lain men’s pair-in bronze an la bawk.

Indian women’s cricket team chuan final an lut bawk a, a chhe berah Asian Games-a an vawi khat inlannaah silver medal an la dawn tih a chiang ta.

Men’s hockey team chuan an khelh hmasak berah Uzbekistan chu 16-0 zetin a ni khatnaah hian an sawp bawk.

Sunil Chhetri-a hova thawk chhuak Indian men’s football team chuan Pathianni tlai khan Myanmar chu 1-1 a hnehtawkin group stage an paltlang a, round of 16 an lut ta bawk a. Round dawt lehah hian Saudi Arabia an hmachhawn dawn a, Ninganiah an inkhel ang.

Women’s football team erawh an tla fel tawh thung.

World champion vawi hnih ni tawh, boxer Nikhat Zareen-i chuan Asian Games a inlan hmasak berah a ni khatnaah hian Asian champion vawi hnih ni tawh, Nguyen Thi Tam (Vietnam) chu women’s 50kg-ah a hneh a. Preeti Pawar-i pawhin women’s 54kg quarter-finals a lut a, Jordan boxer Silina Alhasanat chu RSC hmangin a hneh.

Men’s leh women’s table tennis team chu medal la lovin an haw a ngai dawn tih a chiang ta thung a. Mipa hi quarter-final-ah tlain hmeichhiate hi pre-quarterfinal-ah an chak lo thung a. Men’s volleyball pawh vawi riat zet Asian Games champions Japan hneh lovin an tla bawk. 

Sumit Nagal-a leh Indian men’s doubles pair chu tennis-a an inkhelh hmasak berah hnehna an chang hlawm. 

Fencer Taniksha Khatri, swimmer Srihari Nataraja leh FC Online player Charanjot Singh te pawh Hangzhou ni khatnaah hian an che chhe lo bawk.

India tan beisei a sang em?
Hangzhou, People’s Republic of China-ah Asian Games 2023 hi Inrinni zan khan hawn a ni a. Kuminah hian India pawhin infiammi 655 zet tirin kum dang angin beiseina pawh a sang.

Khawmualpui huap inelna lian hi a vawi 19-na a ni a, Inrinnia hawnna inkhawm neih a neih hma khan infiamna thenkhat chu khelh tan a lo ni tawh hlawm a, October 8 hian zawh fel tura duan a ni.

Kum li dana neih thin infiamna inkhawmpui hi kum 2022-a neih tawh tur kha niin COVID-19 avangin kum khata sawn hlat a ni.

A hnuhnung ber, Jakarta 2018-ah khan India hian infiammi 570 a tir a, Asian Games neih tawh zawng zawnga a chet that ber tum niin medal 70 (gold 16, silver 23 leh bronze 31) zet a la a. Kuminah hian a infiammi tirhte sulhnu enin kum nga kal ta aia a chet that a inbeisei hle.

Asian Games-ah hian kumin inelna tan hma thleng khan India hian medal 672 la tawhin heng zinga 254 hi athletics atanga a lak a ni a. Hangzhou 2023-ah pawh hian track and field huangah hian medal a hawn leh nual beiseina a nei a, infiammi pawh 68 zet telin infiamna hrang hrang zinga an tamna ber a ni.

Hangzhou-a Indian athletics squad zingah hian fei khawha world, Olympic leh Asian Games champion Neeraj Chopra pawh a tel a, ani hian gold a khawh chhuah ngei beiseina a lian hle a. Ani bakah hian Commonwealth Games men’s 3000m steeplechase silver medallist Avinash Sable leh women’s hurdles-a a chhuanvawr, Jyothi Yarraji te chungah beiseina a innghat lian hle bawk.

India hian Asian Games-a a vawi khat nan cricket team pawh a tir a, hmeichhia leh mipa an inlan a. Football leh hockey-ah pawh an tel kawp bawk.

Boxing lamah world champion Nikhat Zareen leh Olympic medallist Lovlina Borgohain-i hovin an thawk chhuak a. Wrestling team-ah Olympic medallist Bajrang Punia leh Antim Panghal an tel thei bawk a, anni hi medal la phak ngei tura beisei an ni.

Silai kahah Manu Bhaker leh Rudrankksh Patil te lakah Indian mipuite mit a fu mek bawk.

Olympic medal lo dawng ve ve tawh, weightlifter Mirabai Chanu leh badminton star PV Sindhu te pawh India hmingin Hangzhou-ah hian an inlan dawn a. Archery world champions Aditi Gopichand Swami leh Ojas Pravin Deotale ten beiseina sang tak an nei bawk.

Hangzhou-a intihsiaknaa medal lak a hlut piah lamah, Paris 2024 Olympic Games kal phak tur infiammi 74 lai thlitfimna a ni nghal bawk a. Archery-ah paruk, artistic swimming-ah 10, boxing-ah 34, breaking-ah pahnih, hockey-ah pahnih, modern pentathlon-ah 10, sailing-ah paruk, tennis-ah pahnih leh water polo-ah pahnih tel phak an awm thei dawn.