Indian men’s 10m air rifle team chuan Thawhtanni tuk khan world record thar siam chungin Asian Games 2022-ah India tan gold medal hmasa ber an kap chhuak.

World champion Rudrankksh Patil, Olympian Divyansh Panwar leh Aishwary Pratap Singh Tomar pathumte hian team event-a qualification round-ah point 1,893.7 kap chhuak phakin record thar hi an siam a. Rudrankksh-a’n point 632.5, Tomar-a’n 631.6 leh Panwar-a’n 629.6 an kap.

Rudrankksh leh Aishwary te hi men’s individual 10m air rifle final an lut bawk.

Men’s 10m air rifle team-ah hian world record ding lai chu 1,893.3 niin thla khat pawh la liam lo va, World Championships, Baku, Azerbaijan-a Chinese tlangvalte siam kha a ni.

South Korean tlangvalten point 1,890.1 kap chhuakin silver medal kap chhuakin intihsiakna thlengtu, China (point 1,888.2) chuan bronze medal an la bawk.

Hangzhou 2022-ah hian India hian medal pasarih - gold pakhat, silver pathum leh bronze pathum an la ta.

Asian Games-ah hian silai kah hi Pathianni atanga tan kha niin October 1 thleng a awh dawn a. Medal sem chhuah hun vawi 33 lai awm tur niin Fuyang Yinhu Sports Centre-ah rifle, pistol leh shotgun kah huangah chi hrang hranga inel a ni dawn.

Olympian Manu Bhaker leh world champion lo ni tawh, Rudrankksh te chu tun tuma India-in silai kap thiam 33 a tirh chhuah zinga hming langsar sa an ni.

MEDAL TALLY (September 25, 2023 - 10:10 am)
1. CHINA - G 27, S 11, B 5, T 43
2. SOUTH KOREA - G 5, S 6, B 6, T 17
3. JAPAN - G 3, S 9, B 6, T 18
4. UZBEKISTAN - G 3, S 4, B 3, T 10
5. HONGKONG - G 2, S 2, B 6, T 10
6. INDIA - G 1, S 3, B 5, T 9