Indian martial artist pathum chu China-in Asian Games a thlen turah an rama luh ve a la phalsak loh avangin ramria inngur reng pahnih hi an inhnial lawk thar phah lek mek.

An zinga tel hmeichhe pahnih hi China-in a ram china a chhal fo thin, India hmarchhaka Arunachal Pradesh-a mite an ni.

Inrinni atanga Chinese khawpui, Hangzhou-a tan, Asian Games-a inelnaa tel turte an ni.

India chuan Beijing-in an zin ve a phal lo va, dan ang veka lehkha pawimawh an neihte chu a pawmsak duh lo niin a puh.

China erawh chuan Delhi puhna hi phain infiammi tupawh, dan ang thlapa lehkha nei chu pawm loh an nei lo niin an sawi ve thung.

Indian chanchinbute chuan wushu khel tur pathum - Nyeman Wangsu, Onilu Tega leh Mepung Lamgu te chu an lehkha pawimawh an download ve theih loh avangin mi dangte rualin an kal ve lo niin an sawi.

An team-a tel ve dangte chuan an harsatna ang hi engmah an tawk ve lo niin an tar lang bawk.

Indian foreign ministry chuan China hian heng infiammite hi a ‘tum sa leh ruahman lawk’ angin a ‘enhrang’ niin a sawi.

“India chuan hetianga Indian khua leh tuite an cheina hmun leh an hnam avanga en hranna ang hi a pawm lo hulhual a ni,” a ti.

“Arunachal Pradesh hi India ram bung leh India chhunga awm a ni a, a ni reng dawn bawk a ni,” a ti.

India hian hetiang thil a thleng hi a duh lovin a lungawi lo tak zet a, a tihlan nan sports minister-in Games chhima tlawh a tum pawh a thulh nghal.

Olympic Council of Asia (OCA) hotu pakhat chuan China hian heng hmeichhiate hi visa a pe ve vek tho va; mahse, India aiawha kal ve tur dangte a pek ang ni lo, a hrang pek bik an nih avangin an pawm duh lo niin a sawi.

“Chinese sorkarin kal dan (regulation) a neihah, visa chi hrang hrang pek theihna hi a nei a ni,” tiin Wei Jizhong chuan a sawi.

OCA hotu dang pakhat chuan Games thlengtu organising committee chu heng hmeichhiate inelnaa an tel ngei theih dan tur dapin an buaipui tih a sawi ve bawk.

Tun hi lehkha thil avanga inhnialna a awm vawi khatna a ni lo.

Heng infiammite tho hi Chinese khawpui dang pakhat, Chengdu-a World University Games-ah pawh khan stapler-a chilh visa an dawn bik avangin an tel lo tawh.

Heng visa hi India-in a ram anga Arunachal Pradesh a chhal chu China-in a pawm lohzia lantirna a ni.

Beijing chuan hmarchhak state hi ‘South Tibet’ tiin a sawi a, India chuan a hnawl hmak thung a. India hian China-in a thunun, Himalaya tlang chung zawl, Aksai Chin pawh a ramah a chhal bawk.

Chinese foreign ministry thupuangtu chuan Zirtawpni khan Beijing chuan ‘dan dik taka lehkha tul ang nei infiammite chu Hangzhou kal tur leh Asian Games-a inlan turin an lawm em em vek’ tih a sawi.

“Chinese sorkar hian Arunachal Pradesh tiin a sawi ngai lo va, South Tibet hi China ram chin ni sa a ni,” tiin a sawi bawk.

India leh China hi Himalaya tlangdungah km 3,440 zeta thui inriin heng hmunte hi khawih theih loh a ni a, Line of Actual Control (LAC) tiin an sawi a, ramri hi a chiang lo hle a, hmun tam takah lui, dil leh vurin a khuh tlang a kal tlang a, a insawn fo thin.

Ram inchuhna a nat avangin ram pahnih hian hmun eng emaw zatah sipai tam tak an chhawp ve ve a, an intibuai zauh zauh fo va. A hnuhnung ber chu December thlaa ramri khua, Tawang-a Indian leh Chinese sipaite intihbuai kha a ni.