Aizawl; Assam state chhung hmun hrang hrang a duty Mizoram 3rd IR bn. zingah Covid 19 hri vei vanga harsatna lian tham tawk an la awm lo. 

ZALEN thudawn danin 3rd IR Bn. mi 400 bawr vel te chu Assam state, district 5 chhung hmun hrang hrang 13 ah an duty mek a, an headquarters, Darrang atanga km 300 vel a hla ah te pawh duty an awm. "Hmun hrang hrangah ngawrh takin kan duty a, kan theih ang angin tawngtaina ah te kan inhlan a, theihtawpin fimkhur kan chhuah," thudawnna chuan tiin, "Tun thlengin harsatna lian tham lutuk tawk lo va kan la awm theih nachhan chu tawngtaipuina kan dawn tam vang leh theihtawp chhuah a fimkhur kan chhuah vang niin kan hria," a ti bawk.

Assam state chhung a duty 3rd IR Bn. mi 400 bawr vel zingah tun dinhmunah Covid 19 hri kai mi 5 an awm mek a, ngaihtuahawm an awm lo a, natna lang chhuak lo an ni tlangpui. Chung mite chu Mizoram a chawlh hmang zo, rawn haw thla an ni deuh vek bawk. "Covid 19 hrileng kar ah duty in kan chhuak lo thei lo a, mask vuah ah fimkhur tha tur leh kut silfai tha tur te in kan in chah nasa a, tun thleng chuan Assam atanga Mizoram lut te pawh an test result a negative deuh zel zawk," thudawnna chuan ti bawkin, immune system ti chak tur pawhin a theih ang angin taksa sawizawi kawngah pawh hma an lak thu a sawi.

Assam state chhung hmun hrang hrang a awm mek Mizoram 3rd IR Bn. te hian an awmna hmun theuh ah fimkhur takin duty an kalpui a, tunhnai a Assam inthlanpui neihah pawh tha takin an duty an hlen chhuak thei a ni.