Assam-a tui lianin district 11-a mi nuai 1.33 tibuai mek

Admin - Aug 28, 2021

Biswanath, Bongaigaon, Chirang, Dhemaji, Dibrugarh, Jorhat, Lakhimpur, Majuli, Sivasagar, Sonitpur leh Tinsukia district-te an ni

Assam state disaster management agency chuan an state-a tui lian chuan zual lam pan zelin district 11-a mi nuai 1.33 chuangin an tuar mek tih an sawi.

Tui lian thlen mekna hi Biswanath, Bongaigaon, Chirang, Dhemaji, Dibrugarh, Jorhat, Lakhimpur, Majuli, Sivasagar, Sonitpur leh Tinsukia district-te an nih thu bulletin an tihchhuahah an tar lang. Brahmaputra lui leh a pengte luang liam avang hian khaw 243-a chengte an buai mek.

Mihring thi leh hliam leh ranvulh thi an la awm lo hlauh niin bulletin-ah hian an tar lang bawk.

Mihring 162 leh ran vul 40 chu hmun himah suan chhuah tawh an nih thu a saw.

Bongaigaon leh Chirang district-ah chuan relief camp 66 an siamah mi 6,217 an khawsa mek a. Dhemaji district-ah panga leh Tinsukia district-ah pathum siam lawk sa a awm bawk.

Bongaigaon district hi a tuar na ber niin mi 63,891-in an tuar mek a, Dhemaji-in dawtin mi 31,500-in an tuar a. Majuli-ah mi 13,239-in an tuar bawk.

Medical team panga inrintir an ni tih bulletin-ah hian an tar lang bawk.
Bongaigaon leh Dhemaji-ah kawngpui 16 a chhe tawh.

Tui lianin ram tha a lak hi Baksa, Biswanath, Bongaigaon, Chirang, Goalpara, Cachar, Jorhat, Kokrajhar, Majuli, Morigaon, Nalbari, Sonitpur leh Tinsukia district-a hmun tam tak atangin sawi a awm bawk.

Share now