Assam-ah chief minister-in ruihhlo thahem tel hal ral

Admin - Jul 18, 2021

Diphu, Golaghat, Nagaon leh Hojai-ah hal a ni

Assam Chief Minister Himanta Biswa Sarma chuan nimin khan tun hnai thla tlem chhunga ruihhlo chi hrang hrang an man tihral tan an tumah hmun hnihah Rs. Vaibelchhe 170 man a hal ral.

Sorkarin ruihhlo hal ralna tur hi hmun li a ruahman a. Nimin khan Diphu leh Golaghat-ah hal a ni a, vawiin hian Nagaon leh Hojai-ah hal a ni ve thung ang.

Chuanchung lam, Golaghat-a a hal ralnaah Chief Minister Sarma chuan, “Thla hnih liam ta chhung khan ruihhlo Rs. Vaibelchhe 163 chuang man kan police department-ten an man a. Hei hi kan state-a ruihhlova sumdawnna kal meka 20-30% vel chauh a ni a. Assam-ah hian ruihhlova sumdawnna hi Rs. Vaibelchhe 2,000-3,000 vel a awm tihna a ni,” a ti.

Kumin kim tir lama Sarma-a chief minister a nih hnuah police chuan nasa zawkin ruihhlo lakah hian beihpui an thlak.

Assam Police-in thuchhuah an siamah thla hnih liam ta chhungin heroin kg 18.82, ganja kg 7,944.72, khuh damdawi um 67,371, damdawi chi hrang hrang mum 12,70,394, morphine kg 1.93, methamphetamine kg thum leh  opium kg  3,313 an man.

Myanmar atanga ruihhlo lutte hi Diphu, Karbi Anglong kaltlangin a ni ber a, Nagaland kaltlangin Golaghat atangin a lut thin bawk.

Chief minister hian Twitter-ah ruihhlo a hal thu hi a tar lang a. Diphu-ah morphine kg 11.88, crystal meth kg 2.89, heroin kg 3.47,ganja kg 102.91 leh damdawi mum 2,03,384 leh Golaghat-ah Rs. Vaibelchhe 20 man heroin gram 802, ganja kg 1,205, opium kg thum leh damdawi mum 2,06,906 halral a nih thu a sawi bawk.

Share now