Assam-ah Mizo bumin sum leh thildang an laksak

Admin - May 30, 2021

Ailaidum to deuha lei duh anga insawiin Mizoram atangin an ko thla a, Assam thingtlang kilkhawrah kovin an lo suam thung

Aizawl: Tunhnaiah Assam lam mi thenkhat ten Mizoram mi leh sa te bumin an sum neih ang ang an laksak bakah suam tawk te an awm avangin fimkhur a ngai hle tih Guwahati DRC chuan ZALEN a hrilh a. Tunhnaia maiah pawh mi pakhat chu nuai 6 an laksak a, hei lo pawh hi bum an awm nual nia thudawn a ni.

Guwahati a Mizoram sawrkar aiawh Deputy Resident Commissioner Zothanmawia chuan tunhnaiah pawh misual thenkhat ten 'pawisa kan tihpun sak ang che u' tia bumin mi thenkhat te an ko thla a, pawisa lem te an pek bakah suam tawk te pawh an awm niin a sawi. DRC chuan, "Tunhnai mai khan mi pakhat chu pawisa tihpun sak tur nia insawiin Guwahati ah an ko thla a, mahse pawisa lem emaw lehkha chhia telkhawm te an pe a. Inbumna dang leh chu Ailaidum to deuha lei duh anga insawiin Mizoram atangin an ko thla a, Assam thingtlang kilkhawrah kovin an lo suam thung a ni," a ti. 

Zothanmawia chuan an mi bum te hi an khawngaihthlak hle nia sawiin bum tawh vanga Mizoram house belbul hi kumin chhung ringawt pawhin mi 3 an awm tawh niin ZALEN a hrilh a. Sum peipung thei nia insawi te hian an sum an chan mai bakah Ailaidum lei duh nia insawi te hi suamin an phone thlengin an laksak niin a sawi a. Hheng bum tawk te hian ei leh in man pawh an neih loh bakah an haw na tur thlengin ngaihtuah sak te an ngai nia sawiin inbumna laka fimkhur turin Mizoram mipuite a chah bawk.

Misual ten an bum zinga mi pakhat chuan a sum nuai 6 chu misual te hian an neihsak nia sawiin a hmuhlet leh theihnan Aizawl PS ah FIR a thehlut tih a sawi. ZALEN in a biakna ah bum tawk pakhat chuan misual te hian social media (Facebook) atanga rawn be tanin pawisa an tihpun sak theih thu an rawn hrilh niin a sawi a. "A tirah chuan ka awih lova, mahse hun engemaw chen kan inbiak hnuah in zai (operation) tur ka nih avangin sum tihpun chakna kha ka nei ta a. Kan pawisa chu a let thum zel (nuai 1 ah nuai 3, nuai 5 ah nuai 15) tipung tura an insawi avangin ka sum mamawh nen nuai 6 an Account ah kan thun a, mahse engmah hmuh let ka nei ta lo a ni," a ti a. "Inbumna lakah hian Mizo mipuite fimkhur se ka duh tak zet a, ka hmaah hian nu 2 bakah car leitum pa pakhat bakah zirtirtu pension hlim pawh an sum an laksak vek a ni," a ti bawk.

Bum tawk pa sawi danin misualte hian April ni 8,2021 khan Guwahati ah ko thla in Assam-Arunachal Pradesh ramri ah pawisa tihpunna khawl hmangin pawisa an tipung lai an entir a. Khawl hmanga an pawisa siam hi a tak nen a inang chiah nia sawiin thil leina atan pawh a hmang thei niin a sawi a. Misualte A/C a pawisa a thun hnuah anmahni chuan call an la duh tawh lo tih sawiin Guwahati Mizoram House be pawpin misual ten an bum tih a hriat hnuah a rawn haw chho ta niin a sawi bawk.

Share now