Assam-ah Taliban thlawptu mi 14 man

Admin - Aug 24, 2021

Pakhat chu MBBS zirlai, Hailakandi mi a ni

Afghanistan-a Taliban an len thar leh mek laiin Assam-a district 11 zetah social media-a anmahni thlawp zawka thu an tar chhuah avangin mi 14 man an ni. 

“District 11-ah mi 14 man an ni a, an zinga pakhat chu MBBS zirlai, Hailakandi-a mi niin Tezpur Medical College-ah a zir mek,” tiin police hotu sang pakhat chuan a sawi.

“Thenkhat hi chuan chiang takin Taliban an thlawp thu an tar lang a, thenkhat erawh chuan India leh chanchinbuten Taliban an thlawp loh avanga demna an tar lang a, heng thil hi chi leh chi inkar boruak siamna vek a ni,” a ti.

An mi mante hi Assam police-a Cyber Cell-in social media hrang hrang an vilna a\anga an man a ni a. Special Branch (SB) chuan man tur hian beihpui an thlak a ni. 

Deputy Inspector General Violet Baruah chuan Assam police hian social media-a Taliban thlawpna lam thu thehdarh reng reng chu dan angin an lakah hma an la zel dawn tih a sawi.

“Heng mite lakah hian thubuai siam a ni a. Hetiang thil hi in lo hmu leh a nih chuan police in lo hrilh zel dawn nia,” tiin Twitter-ah a tar lang bawk.

Police-in an sawi dan chuan Taliban-ten kum 20 dawn hnua Afghanistan an lak let hnuah khan social media profile 17 atanga 20 velin Taliban leh Afghanistan-a an chetna an thlawpna an tar lang. 

Police chuan heng thu tar lan hi district 11-a mite niin pathum dang chu Assam pawn lam, Dubai, Saudi Arabia leh Mumbai atanga tar lan an ni tih an sawi.

Mi dang pathumte pawh hi an chhui zui mek a, Intelligence Bureau hnenah an chanchin kimchang pawh an thlen tawh.

Share now