Aizawl; Mizoram leh Assam inkar ramri buaina avanga inkahna thlengah Mizoram police te chuan Assam CM leh official thenkhatte lakah Vairengte PS ah thubuai an ziaklut a, naktuk August 2, 2021 ah Vairengte PS a inlan turin an hriattir.

Vairengte PS ah hian Assam chief minister Himanta Biswa Sarma, Vairengtea Mizoram Police camp-a Assam police rawn hotu IGP Anurag Agarwal, Assam DIG Devojyoti Mukherjee, Cachar DC Keerthi Jalli, Cachar SP Chandrakant Nimbalkar leh Dholai PS OC Sahab Uddin te lakah thubuai ziaklutin, Indian Penal Code (IPC) hnuaiah thubuai chi 12 hmanga hrem tura case siamsak an ni.

Heng mite laka thubuai ziahluh zingah tual-thah tumna, a huhoa pawikhawih tumna, Arms Act leh Mizorama Covid-19 kaihhnawiha sawrkar dan dinglai bawhchhiatna te pawh a tel a, naktuk August 2, 2021 ah Vairengte PS a inlan tura hriattir an ni.