Aizawl: Assam sawrkarin tun hnaia Mizoram leh Assam ramria innghirnghona thlengah an tihsual thup bo nana Mizoram sawrkar ruihhlo chungchanga dik lo taka an puhna chu Mizoram Home Department in a chhang let.

Assam sawrkar chuan July ni 29,2021 khan thupek ti chhuakin an police te chu Mizoram atanga Assam rama lirthei tlan lut zawng zawng Assam leh Mizoram ramri ah endik turin thu a pe a. Ruihhlo an phur lo tih finfiah a nih hnuah, Sub-Inspector aia hniam lo Police Officer-in, chhuahtir a remtih hma chu heng motor te hi hreng turin thu an pe a ni.

Mizoram Home department chuan thuchhuah siamin, Assam sawrkar thupek hian Mizoram atanga Assam pana lirthei tlan te chu Assam Police ten chhan mumal awm lovin harsatna an siamsak dawn niin a ngaih theih, a ti a. Mizoram sawrkar erawhin vawi tam tak ruih-hlo tawlhruk tuma Assam ram atanga Mizorama lo lut lirthei lo man tawh thin mah se, khualzin te phurrit siamsak turin Assam atanga Mizoram ramri paltlang lirthei zawng zawng check ngei ngei tur tih thupek a la tichhuak ngai lo tih sawiin, Assam leh Mizoram inrina paltlanga lo lut khualzinte chu zalen takin veivah phalsak an ni tih an thuchhuah chuan a tarlang.

Home department thuchhuah chuan kum 10 liam ta chhung khan Assam ram atanga Mizorama ruihhlo tawlh luh tum tam tak man an lo ni tawh a, drugs man te hi heroin kg 1.05 a rit, pseudoephedrine kg 3057.08 a rit, Parvon Spas mum nuai 4,30,385, ganja kg 24.114 a rit leh proxyvon mum 1,3053 a tling tih a sawi a, hemi kaihhnawihah hian case 296 ziahluh a ni tawh a, Assam mi 395 man an ni tawh tih a sawi bawk.

Ruihhlo hmanga sumdawn chu state pakhat chauh tihtawp theih a ni lo a, khawvel pumpuiin a buaipui tih Home department thuchhuah chuan a sawi a, he buaina chingfel tur hian tanrual a ngai a, state pahnih ramri depa District Police duty te inlungrual taka an thawhhona hnuaiah lo chuan drugs tawlh luh hi dan beh theih a ni lo, tiin ruihhlo dona kawnga hmalakna ah pawisawi lo te tul loa vaukhan leh harsatna siamsak chu thil tih chi a nih loh thu home department thuchhuah chuan a tarlang bawk.