Aizawl: Mizoram chhim lama Assam Regiment ten operation an nei anga thu thang mekah Mizoram Police lam chuan hetiang lam thil a awm loh thu an sawi a, Assam Rifles battalion thum ten Joint training exercise an nei satliah mai tih ZALEN an hriah.
He thuthangah hian Mizoram Police lam chuan enquiry an la nghal a, operation nei nia an sawi hi thil hranpa teh chiam ni lovin, 1st, 10th leh 46th Assam Rifles battalion ten Joint training exercise an nei mek a, hei hi tihdan phung pangai (Routine mock exercise) a nih thu an sawi.
DIG (CID) Neihchungnunga, IPS chuan, "Hemi chungchang hi kan chhui chiang tawh a, Assam Rifles Battalion thum te hian Joint training chhim lamah hian an nei ho a, Assam Regiment ten operation an nei anga sawi hi chu a ni lo. Lehlamah Assam Rifles te hi ramri veng tura awm an ni a. Burma ramri lamah buaina a awm deuh reng avangin then khatin hetianga an lo sawi pawh hi a awm ve thei a, mahse, chutiang chu a ni lo," a ti.
Heng batallion thum te hi Mizoram chhung veka inkulh an ni a, a hu hovin indo nunchan hi an zir mai niin Police lam hian an sawi bawk.