Aizawl September 26, 2023 : Inspector General Assam Rifles (East) kaihhruaina hnuaiah Assam Rifles vawiin khan Circular Lawn, Raj Bhavan-ah investiture ceremony buatsaih a ni a. He inkhawmah hian Governor Dr Hari Babu Kambhampati chuan Jawan 23 hnathawk tha thlanchhuah te hnenah chawimawina Governor’s Gold leh Silver Medals a hlan.

Governor Dr Hari Babu Kambhampati chuan ram venhimna kawngah Assam Rifles ten Mizoram ramri hrulah hna pawimawh tak an thawk tih a sawi a. Assam Rifles te thawhhrimna leh state sawrkar hnathawkte an thawpui that avangin ralthuam, ruihlo leh dan lova bungraw tawlh tam tak man a ni tawh a ni a ti. Governor chuan vawiinah Assam Rifles zingah sipai chhuanawm tak tak heti zat chawimawi tur an awm chu lawmawm a a tih thu a sawi.

Assam Rifles officer te leh sipai zawng zawng te chu state sawrkar hnuaia dan leh thupek kengkawhtute tha taka thawhpui chhunzawm a, Mizoram himna leh muanna atana an theihtawp chhuah chhunzawm zel turin a fuih a ni. Governor chuan Mizoram in inthlan a hmachhawn dawn avangin Assam Rifles te chu an duty na hmunah fimkhur leh zual turin a chah nghal bawk.

AR Investiture Ceremony-ah hian Chief Secretary Dr Renu Sharma ; Mizoram Police DGP Anil Shukla ; Major General Vinod Kumar Nambiar, YSM, SM, Inspector General Assam Rifles (East) leh Brigadier Girish Upadhya, SM, VSM, DIG, 23 Sector Assam Rifles bakah Assam Rifles Officer te leh sawmbik te an tel a ni.