Aizawl: Mizoram Legislative Assembly din tharah eptu party chu MLA 13 lai thlang tling mah se dan ang taka Leader of Opposition an awm thei dawn lo.   Zalen palaiin Assembly Secretariat thawktute hnen atanga thu a dawn danin Mizoram legislative Assembly inthlanpui neih zawh takah khan MNF-in seat 27, ZPM-in seat 8 (seat 1 a ruah tak avangin tun dinhmunah seat 7), Congress-in seat 4 leh BJP-in seat 1 an la a. Eptu party hi an vaiin 13/12 an ni a, Legislature pakhat ni se chuan danin a phut MLA hmun lia thena hmun khat (4/1) an tling phak a; mahse, Legislature party hrang hrang an nih avangin hmun khata an inhlawmkhawm a nih loh chuan dan ang taka Leader of Opposition nihna chu eptu hruaitu hi pek theih a ni dawn lo a ni. Tun dinhmuna eptu hruaitu tura ngaih, Serchhip bial atanga ZPM ticket-a thlantlin, Lalduhoma chu Leader of Opposition ni lovin Opposition group leader a ni ang.   Assembly Secretariat thawktute chuan Assembly House-a MLA-te thutna tur chu tun thla chhung hian tihfel hman an tum tih an sawi a. MLA-te thutna tur chu party-ten an ruahman thin nia sawiin, thutawp erawh Speaker thu a ni tih an sawi bawk.   Session chawlh laia MLA-te awmna/chawlh hahdamna tur pawh an tifel tawh niin Assembly Secretariat thawktute chuan an sawi a. Ruahmanna an siam dan chuan ZPM MLA-te chu Recess room ‘A’-ah an chawl ang a, Congress MLA-te chu Recess room ‘B’-ah an chawl ang a, BJP MLA chu common recess room-ah a chawl thei ang. BJP MLA room an pek theih loh chhan chu dan anga Legislature party din tham an awm loh vang niin an sawi.   Leader of Opposition hi Cabinet Minister rank niin hlawh leh hamthatna dang pawh Cabinet Minister dawn ang an dawng vek a ni.