Samsung chuan August 20 hian India ramah smartphone model thar chi hnih - Galaxy Z Fold 3 leh Galaxy Z Flip 3 te an tlangzarh dawn. 

South Korean company Samsung hian Bollywood actor Alia Bhatt chu launch programme atan hian an thawhpui a, ngaihventu an thahnem leh zual ngei ang. Samsung India chuan hemi chungchang hi Twitter lamah pawh an tarlang chuai chuai tawh a, boruak siam len an tum hle. 

Galaxy Z Fold 3 leh Galaxy Z Flip 3 te hi August 11 (Nilaini) khan khawvel hmun thenkhatah chuan tlangzarh a lo ni tawh a, Galaxy Buds 2 leh Galaxy Watch 4 series te an tlangzarh tel nghal - India ramah pawh tlangzarh a ni thuai dawn e. 

Z Fold 3 leh Z Flip 3 te hi thleh theih a ni a, a changkang viau mai. 

Z Fold 3 hi triple rear camera niin Galaxy Z Fold 2 nen khan a danglam tam lutuk dawn lo. Galaxy Z Fold 3 hi India ramah chuan Rs. 1,33,600 man vel a ni dawn a, Galaxy Z Flip 3 erawh a tlawm deuh a, Rs. 74,200 vel a ni thung ang. 

Heng model chi hnihte hian Qualcomm Snapdragon 888 SoCs an hmang ve ve dawn a, a camera tha hi company lamin an hmachhuan ber pakhat a ni.