India ram pum huap dap chhuak television channel-a state khat football league tihchhuah hmasak ber, Mizoram Premier League (MPL) chu 2023-24 season atan August 24 hian khelh tan tura ruahman a ni.

Ningani khan Mizoram Football Association (MFA) hnuaia MPL Board chuan MPL-10 kalpui dan tur leh pawimawh hrang hrang an tichhuak a. November thla chawhma lama zawh hman turin an ruahman tih an tar lang.

MPL-10-ah hian club tinten All India Football Federation (AIFF)-in a hman mek, Centralised Registration System (CRS) hmangin player 30 aia tam lo an ziak lut thei dawn a. MFA chuan CRS bakah hian Competition Management System (CMS) hmang ngeia player leh a enkawltute ziah luh leh kalpui turin club-te an ngen nghal bawk.

Mizorama football league sang ber season tharah hian ram dang (foreign) player chhawr phal a ni dawn lo va, state dang player erawh panga aia tam lo lak phal a ni a, khelmual chhungah erawh a rualin pahnih bak khelh phal a ni dawn lo thung.

MPL-10 khel tur club enkawltu, head coach pawh AIFF/Asian Football Confederation C-Certificate nei chin chauh chhawr phal a ni tawh dawn bawk.

Eng ball nge an pet leh dawn?
MPL-10-ah hian NIVIA Dominator 3.0 ball hman a ni leh dawn a, hei hi MPL-9-ah pawh khan hman a lo ni tawh bawk.

Dominator 3.0 hi panel 32 thui zawm an ni a, thermobond an tih ang a ni a. A ball sawt a sang a, a thlawk chak bawk a. Butyl bladder hmang niin hei hi a chhunga boruak awmte a hum rei thei.

Khelmual nem deuh zawk leh rovah pawh a hman theih a, chang deuhvah pawh a hman theih a. Phul lem leh phul tak takah pawh a hman theih bawk a. Mizoramah erawh phul lemah hman tur a ni ang.

MPL a tê lo
MPL hi Mizorama football league sang ber niin India ram pumah pawh a san danah pangana (5th tier) a ni phak a. October 24, 2012 atang khan khelh tan a ni.

Season hmasa ber tan dawn, June 14, 2012-a MFA leh ZONET Cable TV Pvt. Ltd ten kum nga daih tur Rs. Vaibelchhe 1.25 hu inremna an ziah kha India hmarchhaka infiamna huanga inremna lian ber a ni hial.

Kum 2017 khan kum nga daih tur bawkin Rs. Vaibelchhe 1.5-in an ziah belh leh bawk a. MPL-8 kha ZONET hian SONY hnenah pe chhawngin live-in SonyLIV-ah chhuah a ni nghe nghe a. Ram pum huap TV-a state football league tihchhuah hmasak ber a ni hial a ni.

MPL hi season kua khelh tawhah Aizawl FC chu vawi li champion tawhin champion ngun ber an ni a, tunah hian Chawnpui FC chu champion lai an ni thung.

CRS leh CMS an tih fo hi
India rama club-ten player lei leh hralh nikhuaa sawi rik ve ziah, CRS hi AIFF-in 2013-14 season atanga a hman tan kha niin online electronic information system a ni.

FIFA Regulations on the Status and Transfers of Players Article 5-ah chuan ‘player chu professional a ni emaw, amateur emaw pawh ni se, Article 2-in a sawi angin association-ah a inziak lut tur a ni,’ tih a ni a, ‘he inkaihhruaina ang zawm player chauhvin FIFA, confederation leh association hnuaia inelnaah a inlan thei ang’ tih a ni a ni bawk a. Hemi zui hian AIFF pawhin a kalpui a ni.

CRS hi player-te inziah luhna, an contract ziah belh leh ram chhunga player lei leh hralh vil (track)-na a ni a. Awlsam zawnga sawi chuan, hetiang thil hi langtlang leh zangkhai zawka kalpuina tur tihna a ni ve thung.

CMS hi a hming ang hian inelnaa player leh official-te manage-na a ni a. An hman dan thinah chuan inkhelh dawnah player leh official-te chu CMS-ah hian ziah luha chhinchhiah an ni zel a, an nihna leh dinhmun chhinchhiahna a ni.