Mipui nghah hlelh Karizma XMR 210 chu tlangzarh hun a hriat ta a, India ramah chuan August 29, 2023-ah khuh hawn a ni ang. Karizma bike ngainatu ten Karizma XMR hi an nghakhlel tawh hle a, tlangzarh hun an ngaichang reng. Hero Honda Karizma chuan thuchiang an rawn nei ta a, August thla tawp lamah an tlangzarh dawn tih an puang chiang ta a ni.
 
Karizma XMR 210 hi Rs. 1.8 lakhs (ex-showroom) man vel a ni dawn a, Yamaha R15 V4 (Rs 1.81 lakhs) leh Suzuki Gixxer SF 250 (Rs. 1.92 lakhs) te nen inel tawk viau tura ngaih a ni. 
Mizoram-ah pawh Karizma hi a hun laia bike lar leh hralh kal ber zinga mi a ni thin a, music video leh film velahte pawh an vawrh lar thin hle a nih kha. Hun rei tak chhung model thar an tihchhuah loh hnuah XMR an rawn chhawpchhuak leh dawn ta a, boruak pawh a nei lian viau a ni. 

Karizma XMR 210 hi Hero MotoCorp chuan dealer event-ah an lo pholang tawh a, 210cc liquid-cooled engine a rawn hmang dawn a, 6-speed gearbox a ni dawn bawk. Sleek headlamp, dual-tone fuel tank, Bluetooth connectivity leh thil thar eng emaw zat a rawn keng tel tura ngaih a ni - disc brake a ni dawn bawk.