August 29, 2023;  Kolasib Auto Rickshaw Drivers Union (KARDU) ten Kolasib khaw chhunga Auto Rickshaw Permit pekchhuah tum cancel tur nawr nan a District Transports Office, Kolasib Office a hnathawktute kal tur an dan chu an chhunzawm zel.

 

Ramfangzaua Ralte, President (KARDU) chuan Auto Rickshaw Permit pekchhuah hrim hrim hi kan dodal a ni lova, 'Eizawnna tur atana mamawh ngawih ngawihte Permit an pe pawh tha an tih thu te sawiin, tun tuma Permit an pek zingah hian Sorkar hnathawk te, Rorel lai Party Block hruaitu, In leh lo tha tak tak leh JCB nei pha hial te leh eizawnna atana Auro Rickshaw Permit mamawh miah lo tih chiangsa te an tel hi, Induhsak uchuak leh a mamawh lo te hnena permit inpek hi a tha kan ti lo' a ti a. Hei bakah hian 'Permit an pek zingah hian chhungkhat atanga 2 hmu, Pafa a hmute, Unau a hmute pawh an awmin, Auto Rickshaw permit 2 nei tawh sa pek leh te pawh an awm tih sawiin, a dinna tur stand ah dinna pawh kan inchan tawh loh lai a hetianga a ruala permit 112 ngawt Permit pek hian Auto Rickshaw hmanga eizawngtu te tan harsatna a siam nasa dawn ani a ti bawk.

 

KARDU hruaitute  chuan an lungawi lohna thu hi Chief Minister hnenah pawh an thlen tawh thu sawiin, CM chuan an nawrh titawp turin a lo ngen  tih an sawia. Mahse an thil phut engmah a hlawhtlinna lam hawi a sawi loh avangin an hmalakna kalpui mek chu tih tawpna chi ah an ngai lo tih an sawi bawk.

 

Kolasib Auto Rickshaw Drivers Union (KARDU) te hian Kolasib khaw chhunga Auto Rickshaw Permit mi 112 lai a ruala a pekchhuah avanga an duhlohna lantir nan August ni 24, (Ningani) atang khan Kolasib DTO Office a thawktu te kal tur dangin, an beisei anga chhanna an hmuh hma chu DTO Office hnathawkte kal tur hi tiamchin awm lovin an danga, vawiin ah pawh Kolasib DTO Office hi khar niin, thawktu kal tur te an la dang chhunzawm reng a ni.