Aizawl: Association for Voluntary Blood Donation (AVBD) General Headquarters Office Bearer-te chuan nimin zing khan Health & Family Welfare Minister Dr. R. Lalthangliana chu a inah an kâwm a, Mizorama thisen pek chungchang leh a kaihhawih thil chi hrang hrang an thlen.   Health Minister hnenah hian AVBD chuan Civil Hospital, Aizawl Blood Bank-a thawktu, a bik takin medical officer (doctor) leh technical staff indaih lohna chungchang a thlen a. Pawl anga thisen pe duh thahnem tak awm mah se, thawktu indaih lohna vangin Civil Hospital, Aizawl Blood Bank-in ni khatah donation camp pakhat bak an huaihawt thei lo a, pawl anga thisen pe duh eng emaw zatin thisen an pek theih loh phah tih sawiin, doctor leh thawktu dang a remchan anga dah belh dan ngaihtuahpui turin a ngen a ni.   Health Minister Dr. R. Lalthangliana chuan mumal zawkin lehkha siama thehlut turin AVBD hruaitute a lo rawn a; a tul anga a lo bawhzui tur thuin a chhang a, AVBD chuan lawmawm a ti hle.