DOWNLOAD OUR APP

Read latest news on your phone
app-store

AW TLANGMAWI KALVARI

Apr 17, 2022

LALRAMTE tih hi hmun 59 ah emaw a awm bawk a, hengte pawh hi KJV leh NKJVahte chuan a rawn dah dik ta a ni. Luka 23;42 thua ‘Tin, “Isu, i ram i thlen hunah mi hre reng ang che,” tih thu pawh “Lalpa, i lalrama i lo kal hunah min hre reng angche,” tiin a han ziak bik ta te hian Vanram awmna hmun chiang takin min hrilh bawk a ni.

Mahmuaka Chhakchhuak -

Aw, tlang mawi Kalvari
Miten hmusit mahse
Tlang dang zawng zawng aiin
Kei zawng ka ngaina hle.
Aw, hlimna tlang, Aw hmun thianghlim
Pathian thisen a luanna chu
Aw, hlimna tlang, Aw hmun thianghlim
Pathian thisen a luanna chu.

Tia fakna hla kan sak tui em em thin ang hian mizo thinlungah chuan Kalvari hi a chiangin a fiah em em a, nimahsela kan Pathianthu berah hian ‘Kalvari’ hi zuk awm hauh chuang lo ia! Kan Mizo Bible-ah ngei pawh hian hmuh tur a awm chuang lo a, English Bible lamah pawh KJV leh NKJV chiahte hian an ziak lang a ni. Bible-ah hian Kalvari tia ziakna hi KJV leh NKJV-ah pawh hian hmun khat chiahah awmin chu chu Luka 23;33 ah a ni. Bible tam berte chuan ‘Golgotha’ tiin an ziak thin a, chu chu mizo tawng chuan ‘Luruh hmun’ tihna a ni. Luka 23;38 thuah pawh hian    Bible dangte’n an ziah hmaih ‘Grik tawng te, Latin tawng te leh Hebrai tawnga ziah te an tar a’ tiin an ziak bik a ni. Tin, LALRAM tih pawh hi hmun 88 ah emaw a awm a.

LALRAMTE tih hi hmun 59 ah emaw a awm bawk a, hengte pawh hi KJV leh NKJVahte chuan a rawn dah dik ta a ni. Luka 23;42 thua ‘Tin, “Isu, i ram i thlen hunah mi hre reng ang che,” tih thu pawh “Lalpa, i lalrama i lo kal hunah min hre reng angche,” tiin a han ziak bik ta te hian Vanram awmna hmun chiang takin min hrilh bawk a ni.

Mithiamte’n Lal Isua thih dawn hnaiha hun a hman dan hetiang hian an ziak a; Pathianni, April 10, 30 AD – Jerusalem atanga Mel 2 a hla Bethani khuaah a kal a, zan riak a. Thawhtanni, April 11, 30 AD – Temple hmuna Sumdawng te avang chuan Isua chu a thinrim hle a, an sumdawnna dawhkante chu a tihdarh sak a.

Thawhlehni, April 12,30 AD – Isua chungchang ah Sakhaw hruaitute chuan inhnialna an nei a, Juda Iskariota chuan Isua a phatsan bawk a.

Nilaini, April 13, 30 AD – Isua chuan Sakhaw hruaitute chu a zilhhau a, rul ang maia that der tum angin a chhuah a, Olive tlang atang chuan Jerusalem khawpui chua tah bawk a.

Ningani, April 14, 30 AD (6pm – 11;30 pm) – Isua chu a zirtirte nen Zanriahhnuhnung an kil ho a. Ningani, April 14, 30 AD (11;30 pm) – Zirtawp ni, April 15 (1.00 am) – Isua chu azirtirte nen Gethsimani huan ah an kal a, a chunga thil lo thleng tur a hriat lawk avang chuan a lungngai em em a

Zirtawpni, April 15, 30 AD (1;00 am – 1;30 am) – Isua chuan a chunga thleng tur chu hmachhawn turin a inbuatsaih a.

Zirtawpni, April 15, 30 AD (1;30 am – 3;00 am) – Thubuai ngaihtuah vawikhatna; Kum 16 lai Puithiam Lal ni tawh Anna chuan Isua chungchang chu a hnial a. Thubuai ngaihtuah vawihnihna; Puithiam Lal Kaiapha leh Sanhedrin te chuan Isuachungchang chu an ngaihtuahin Thi ngei turin an duh ta a.

Zirtawpni, April 15, 30 AD (3;00 am – 5;00 am) – Isua chu Kaiapha Lal In ah chuan hruai a ni a.

Zirtawpni, April 15, 30 AD (5;00 am – 6;00 am) – Thubuai ngaihtuah vawi thumna; Juda puithiam zawng zawng te, Puithiam Lalber te Lehkha ziaktu te leh Sanhedrin ten en chuan Rom sorkar hnena Isua chu tihlum turin an ngen ta a.

Zirtawpni, April 15, 30 AD (6;00 am – 7;00 am) – Thubuai ngaihtuah vawi li na; Rorelna hmuna ngaihtuah a nih hmain Rom Governor Pilat-a chuan ‘He mihring chung ah hian fellohna engmah ka hmu lo e‘ a ti a.

Zirtawpni, April 15, 30 AD (7;00 am – 7;30 am) – Thubuai ngaihtuah vawi nga na; Galilee ram pumpui awptu, Herod Ropui-a fapa Herod Antipas-a chuan Isua chungchanga zawhna tamtak chu a duhloh avangin rang takin Pilat-a hnenah chuan a thawn let leh ta a.

Zirtawpni, April 15, 30 AD (7;30 am – 8;30 am); Thubuai ngaihtuah vawi ruk na; Pilat-a chuan Isua chu chhuah mai turin a ngen nawn leh a, nimahsela Juda hruaitute chuan an hnial nawn leh bawk a. Pilat-a chuan Juda hruaitute hnenah chuan Isua chu taksaa tawrh theihna tur khawp hmu turin a ngen ta a. Anni chuan Isua chu Kross a khengbet ngei turin an ti a ni. Chu erawh Pilat-a chuan a dodal tlat thung a, a tawpah erawh chuan Isua chu tihlum turin thuthluka a siam ta a ni.

Zirtawpni, April 15, 30 AD (8;30 am – 9;00 am) – Pilat-a chuan Isua chu tualzawl (Praetorium) hmuna hruai turin a sipaite chu a ti a, an sawisa a, an nuihsawh bawk a, chumi hnuah chuan Luruh hmun lamah an hruai ta a.

Zirtawpni, April 15, 30 AD (9;00 am – 12;00 noon) – Isua chu Kross rit tak an put tir a, Sipai te chuan talhfiakin an vaw pah reng bawk a,

Zirtawpni, April 15, 30 AD (12;00 noon – 3; 00 pm) – Isua chu Kross ah an khengbet a, darkar thum lai an khaikanin a awm a.

Zirtawpni, April 15, 30 AD (3;00 pm) - Isua chu a thi ta.

Zirtawpni, April 15, 30 AD – Thlanah an phum ta a.

Pathianni, April 15, 30 AD – Isua chu a tho leh a, a thih hnua hmuh theiha a inlanna hmasa ber a ni.

Good Friday hi Christiante tan chuan hunpui pawimawh tak a ni a, a chhan chu Lal Isua Kalvari tlanga a thih champha a nih vang a ni. Good Friday tih hi Sap tawng lamah chuan sawidan hrang hrang a awm a; Holy Friday tih te, Great Friday tih te, Black Friday tih leh Easter Friday tih tein an sawi thin bawk a ni. Good Friday tih hi a bul takah chuan German hnam tawng Karfreitag tih atanga lak a ni a, ‘kara’ tih chu pawiti, lungngai, sun tihna te a ni a, ‘Freitag’ tih chu Friday tihna a ni. Kara tih chu English chuan mourn (lungngai/sun) tihna a ni. Hei mai bak ah hian German tawng bawkin Stiller Freitag (Silent Friday) leh Hoher Friday (High Friday/ Holy Friday) tiha sawi thin a ni bawk.

Chanchintha bu kan chhiar chuan Temple vengtu chu Isua zirtir zinga mi Juda Iskariot-a chuan a hruai a, Gethsemani huana Isua awmlai chu a mantir ta a, Matt. 26;14-16 thu kan chhiar chuan Tangka 30 a hlawh a ni. Tichuan Isua chu Annahnenah an hruai a, Anna hi Puithiam lalber Kaiapha puzawn a ni. Anna chuan Isua chu zawhna a zawt a, a chanchin a zawt chiang a, chumi hnuah chuan Isua chuPuithiam lalber kaiapha hnen ah a hruai tir leh ta a ni.

Puithiam Lalber Kaiapha kianga awm upa te leh lehkha ziaktute nen chuan Isua chu tihhlum theihna turin hekna tur an zawng a, hretu der tam tak lokal mahsela an hmu thei chuang lo a, a tawp ah chuan Puithiam Lalber Kaiapha chuan Isua hnen ah chuan ‘an hekna zawng zawng ah che hian engtinmah i chhang lo ang maw?‘ a ti a,

Isua erawh chu a ngawi reng a, Puithiam Lalber chuan ‘Pathian nung chhalin thu ka pe a che, Pathian Fapa chu i ni meuh maw? Min hrilh rawh a ti a, Isua chuan ‘nakinah Mihring Fapa hi thiltihtheihna ding lama thu a, van chum chunga lo kal in la hmuang’ a ti ta a, chumi thu a sawi avang chuan Sanhedrin te chuan Isua chu thi tlak ah ngaiin Pathian sawichhetuah an puh ta a ni.

Share now