Aizawl June 16, 2024 : Mipuiten awlsam zawka kawlphetha (power) an siam chhuah leh an siam chhuahte awlsam taka an hralh nan Joint Electricity Regulatory Commission (JERC) for Manipur & Mizoram chuan hma an la mek a, hemi kawnga hmasawn nan tun hnai khan ‘Green Energy Open Charges Regulation 2024’ a siam thar.

ZALEN-in JERC hotute hnen atanga thu a dawn danin boruak tichhe lo zawnga kawlphetha (renewable power) siam chhuah kawngah sawrkar laipui chuan nasa taka hma lak a tum a. Hemi kawnga dan leh dun a lo siamte pawh her remin harsatna awm theite sutkian dan a ngaihtuah mek a. Tui (hydro), ni zung chakna (solar), thli chakna (wind energy), ek hmanga kawlphetha siam (bio gas)-ah te a tam thei ang ber siam chhuah nise tiin ruahmanna a siam a, chung atanga siam chhuahte hralhna kawngah pawh hmalakna kalpui a rel niin an sawi.

Ruahmanna tharah hian kawlphetha hmangtu mipuiten awlsam zawka an lei theih dan tur duan a ni a, power siam chhuaktuten an power hralhna kawngah sawrkar chuan thawhpuiin an line pawh an duh chuan an hmansak thei dawn niin an sawi bawk.

Thli chakna hmanga power siam chhuah a theih leh theih loh chungchang zawhna chhangin JERC hotute chuan, “Thli chakna hi hman theih a nih leh nih loh Sakawrhmuituai tlang, Reiek tlang, Hmuifang leh Mamte ah te zir a ni tawh a; mahse power siamna atan chuan a tha tawk lo tih hmuhchhuah a ni,” an ti a. Thli hmanga power siam tur chuan thli thawk vuk vuk leh na thut thut lam ni lovin chhun zan zawma thli thaw heuh heuhah a tha ber tih sawiin enchhinnaah chuan thli hi a nat laiin a na lutuk thin niin ZALEN an hrilh bawk.