Aizawl: Nimin khan Mizoram chanchinbumi thenkhat chuan mi thenkhat te'n kawngpui an dan mek hi an tlawhin Bhaga chhehvel ah hian lirthei tangkhang 70 vel, Dholai chhehvelah 160 vel an awm bawk a, lirthei engemaw zat chu Silchar lamah an let leh niin an sawi bawk.    

ZALEN in a biakna ah truck driver pakhat chuan, "Mizoram chhoh hi Lailapur hian an remti loa,  Mizoramah hian chho thei pawh ni ila kan haw lamah driver leh handyman te kut min thlak kan hlauh avangin kan ngam lo a, Zirtawpni pawh khan artui phur lirthei chu kut thlakin a motor pawh an tihchhiatsak" tiin a sawi bawk a.         

Bhaga mi thenkhat pawhin Mizoram behchhana eizawng mi tam tak an awm avangin bungraw phurh thuai an duh thu ZALEN an hrilh a, "Mizoramah hian buaina kan tawh kan ring lo a, mahse helamah kut tawrh kan hlauh avangin kan ngam hrih lo a ni," an ti bawk.     

Truck driver pakhat chuan kawng dangtu tute chu mipui nge Assam Police te zawk an nih a hriathran loh thu a sawi ve thung.  Dholai mi thenkhat pawhin an eizawnna in a tuar tawh hle niin an sawi a. Thlai hnah leh rah hralhna lamah pawh harsatna a awm tan niin Mizo media te an hrilh a ni.