Football-a mimal chawimawina siam zingah chuan  Ballon d'Or hi  ngaihhlut hlawh ber pakhat a ni. 

Kum 13 liamta chhung zawng khan kum tina sem thin Ballon d'Or chawimawina dawngtu hi mi pathum chiah an la awm a, chung mite chu Lionel Messi-a'n (6), Cristiano Ronaldo (5) leh Luka Modric (1) te niin Covid-19 hri leng vangin nikum khan Ballon d'Or hi sem chhuah a ni lo thung. 

Tunah chuan khawvel football awp mektu Messi leh Ronaldo hi kum 30 ral kai an nih ve ve tawh vangin an football khawvel hi a rei tawh vakin a rinawm loh. Anni pahnih hun tawp lamah hian player naupang deuh zawk he chawimawina ropui dawng thei tur player ropui an awm nual. Chung player tha tak tak zingah chuan an khelhna club leh ram tana an chet thin dan ena Ballon d'Or award pakhat mai ni lo khai haw thei tur mi panga tar lan kan tum dawn a ni. Chungmite chu:

5. Pedri - Spain/Barcelona
    Barcelona midfielder pa lian lo tak Pedri hi tunah chuan khawvel midfielder ropui ber pawla chhiar ngam pahnih Xavi leh Andres Iniesta te nena khaikhin a ni fo tawh. Tuna kum 18-na hmang mek Pedri hian Barcelona tan regular takin inkhel bul a tan thei der tawh. Season liam ta chhung khan Catalan tan tum 52 a inlan a, goal 4 leh assist 6a nei. 

Kum 18 mi hi Euro 2020 pawh khan Spain innghahna pakhat niin semifinal an thlenna tura player pawimawh a ni. Continental competition tournament-a Young Player of the Tournament a thlan Peri hi a theihna leh thiamna en hian hun lo kal turah Ballons d'Or chawi thei tura rin kai a ni.

4. Kevin De Bruyne - Belgium/Man City
    Manchester City innghahna Kevin De Bruyne thiam zia chu tlang hriat a ni. De Bruyne zarah City hian Premier League-ah ro an rel ti ila kan sawi sual tam lovang. Season liam ta khan De Bruyne hi a player pui ten Player of the Year-ah an thlang nghe nghe. Kum 30 mi hian nikum chhung khan a club tan game 40 khelin goal 10 a thun bakah assist 18 a nei. Euro-a Belgium quarter-final hruai thlengtu De Bruyne hi a skill enin hun rei tak a la khel thei tura ngaih a nia, kumin pawh hian Ballon d'Or dawng tura rin kai a ni phak. 

3. Neymar Jr. - Brazil/Paris Saint-Germain
    Barcelona lamah kha chuan la cham chhunzawm se, Ballon d'Or hi a dawng tawh maithei. Club tan mai nilo a ram tana khel tha thei em em Neymar Jr. hi Ligue 1 lama Paris Saint-Germain ropui taka an awm theih na tura player thawh hlawk ber pakhat a ni. Ronaldo leh Messi hi khawvel player manto ber Neymar-a ropuina daltu lian tak nia ngaih an ni. 

Season liamta khan PSG tan Neymar hi game 31-ah inlanin goal 17 thunin assist 11 a nei. A captain-na hnuaiah Brazil chu Copa America, 2021 final a hruai thleng. Ballon d'Or vawi khat aia tam dawng thei turin kum 29 mi Neymar hian thiamna leh theihna sang  tak a nei tih a hriat. 

2 Erling Haaland - Norway/Dortmund
    Palian tlan chak leh goal thun thei em em Erling Haaland hi tunah kum 21 mi chauh ala ni a, hun tha tam tak ala neih rualin tuna a club khelh mekna Borussia Dortmund atang hi chuan Ballons d'Or award dawn chu thil harsa tak a ni mai thei. Norwegian international hian nikum chhung khan a club tan tum 41 a inlanah goal 41 thunin assist 12 a nei thei. 

Goal a thun theih em vanga club tam takin an rim Haaland hi nakum lam chuan Ballon d'Or dawng tur inelnaa tawh khirh pawl a ni tawh ngeiin a rinawm.

1. Kylian Mbappe - France/PSG
    Beisei angin Euro 2020-ah a chetha tawk lo chungin Kylian Mbappe thiamna hi chu sawi nep theih a ni chuang lo. Game li a khelhah goal khat mah a thun lova assist vawi khat a nei hram a, round of 16-ah uihawm takin penalty a hlah a, Switzerland lakah an tlawm zui. 

Mahse, tun Euro a chetchhiat avang ringawt hian ropui taka alo inlan tawh thinna te kan theihnghilh ngawt thiang lo. Club tam takin an awh em em Paris Saint-Germain fachuam hi a khelhna club chet that leh that lohah a Ballon d'Or award hi a innghat thui hle awm e.

Season liam ta chhung khan game 47-ah inlanin goal 42 a thun a, assist 11 a nei bawk.