Barcelona chuan an player chhuanvawr tun thlaa contract zo tawh mai tur Lionel Messi chu kum hnih dang chelh beh leh ngei tumin in biakna an kalpui mek a, a Birthday June ni 24-a a contract thar puan chhuah ngei an tum thu an sawi zet hnuah an la puang chiang thei rih lo. 

Nikum lam kha chuan Barcelona fans te chuan Messi hian club a chhuahsan mai an hlau thawng hman hle a, tun thla June ni 30 mai hian a contact a tawp tawh dawn vang leh amah duhtu club hrawl tak tak an awm vangin chan mai a hlauhawm hle a ni. 

Messi contract thar turah hian inbiakna neih fel thawkhat ni tawh a, 100% chuan ala chiang rih lo thung. Laporta nena agreement a ziak thei  teuh tawh hle a, hethu i chhiar hunah meuh chuan an ziak fel tawh maithei bawk. Barcelona leh Messi ten an la sign fel loh chhan hi, a hlawh bakah a chhuah theih dan tur chungchangah inrem siamna tlem azawng tih fel loh ala awm vang chauh niin an sawi. 

Barca President Laporta-a’n Barca-a khel zawm tura a sawmna hi Messi hian a pawm tawh a, Messi hi kum 2023 thleng Barca player a ni chhunzawm dawn a nih hmel ta hle. 

Copa America khelh vanga an ram lama cham mek Argentine hma hun hi chiang taka official-a puan la awm rih lo mah se, season hnih dang chu Barcelona lamah hian a cham leh hmel ta rih a, Qatar World Cup pawh Barca player ni chungin a khelh dawn a nih hmel.

Lionel Messi hi tunah a ram Argentina tana Copa America khelin a buai rih hle a, Messi-a kum 34-na lawm turin a pa leh a unaupa pawhin South America lam hi an pan a, he hun tha hi remchangah hmangin a hma hun tur a tlukna an siam fel theih ngei rin a ni.