Tun nipui transfer a titi ti tam ber chu Lionel Messi a’n FC Barcelona atanga Paris Saint-Germain a zawm hi a ni. Catalan club lian  tan kum 21 zet a khelh hnu leh record tam tak club tana a siam hnuin, Argentine superstar leh Barca chuan an inzawmna an chhu chat a; intih thiam lohna tel lova chhuak a nih vangin Messi-a jersey hak thin number 10 chu amah hriatrengna tura tuma hak theih tawh loh tura dah a nih mi tam takin an ring. Mahse, Barca lam chuan an hman zawm zel tur thu an puang a, an duh reng vang nilovin an hman zel tur hian chhan lian tak a neih thu an sawi bawk.

Messi-a’n Ligue 1 club lian PSG free transfer-in a zawm a, inthlahna hun an hmanah  pawh lungchhe takin Messi chuan thu a sawi a nih kha. A chhuahsan hnu hian fans tam tak chuan an ui zia mittui nen an lan tir hial. An duh ber pakhat chu Messi-a iconic number 10 chu midangin a an hak theih tawh loh tur a dah an duh. 

Club legend-te jersey hak thin hak theih loh tura dah hi thil thleng ngailo a ni hran lova, Napoli atanga Diego Maradona a retired  khan a hak thin number 10 chu tumahina an hak theih loh tura dah a ni, New York Cosmos pawhin Pele-a hak thin jersey number 10 chu an dah tha bawk. Chutiang bawkin, Italian clubs AC Milan leh AS Roma te pawhin Paolo Maldini leh Francisco Totti te kawr hak thin chu an zahna lantir nan an dah tha bawk. 

Hetiang a nih mek lai hian vanduaithlak takin Barcelona erawhin Messi-a jersey chu an dah tha ve thei dawn lo thung. An theih loh chhan an sawi dan chuan, La Liga inkaihhruaina danah club tinin senior team squad-ah jersey number 1 atanga 25 an nei ngei tur a ni. Club tin te player 25 in register tura phal sak an ni a, heng zingah hian goalkeeper pathum pawh an tel tur a ni. Keeper te chuan 1, 13 leh 25 an ha thei ang. Club ten season kal laiah an reserve team atanga player lakluh an duh chuan jersey number 26 - 50 an hmang thei thung ang. Barcelona hian number 10 hi an dahtha duh a nih chuan player 24 bak an register thei dawn lo tihna nih chu.