Lionel Messi leh Barcelona inzawmna chu alo chat ta a, Argentina captain hi  Barcelona tana goal thun tam ber record chelh mektu niin goal 672 zet a khung tawh a, La Liga title 10 la tawhin Champions Leagues nomawi mawi 4 leh Copa del Rey tum 7 zet a la tawh bawk a, khawvel inkhel thiam ber chawimawina Ballon d'Or pawh paruk zet hui tawhin amah ang renga dawng tam hi player dang an la awm lo.

Barcelona lam chuan La Liga financial fair play dan hnuaiah an player ni zui tura an chelh theih loh trhu an puan hnuah tunah hian free agent a ni mek a, khawi club-ah nge a kal dawn tih khawvelin a thlir mek a, amah lak tum lang sang zingah Paris St-Germain, Chelsea, Man City leh Juventus an tel.  

Barcelona club-a thil ropui a tih tawh 7 te:

A hat-trick siam hmasak ber
    A career-a Messi-a’n hat-trick a siamna inkhel hi inkhelh satliaha thleng nilovin, khawvel club ropui leh an el leh el ber pakhat Real Madrid nena El-Clasico, 2007 kuma an khel kha niin 3-3 in team hnih te in inhnehtawk a, chak zawk awmlo mahse teenage Messi hian Barca goal zawng zawng hi a thun niin a hat-trick hmasa ber a siam a, hemi tuma hming thanna a hlawhchhuah atang hian a hming a dai leh ta lo. 
UCL final-a goal thun hmasak ber 2009 Champions League final khan Lionel Messi chuan Manchester United lakah goal thunin Barcelona hi 2-0 in an chak. 

He game-a goal a thun  hma hian Messi hian tum 10 lai Champions League-ah English club hmachhawn hmanin goal a thun lo vek.  Hemi tuma a goal thun hi a hman ngailoh tak a lu hmanga Xavi cross ball a tauh luh a ni a, Cristiano Ronaldo nena an inhmachhawnna hmasa ber a ni bawk.

Kum hnih hnuah United nen bawk intum lehin chakna goal a thun leh a, UCL trophy a lak pali zinga a tum thumna a ni nghe nghe. 

Arsenal lamah goal 4
    2010 Champions League, quarter-final ah Arsenal lakah Barcelona chu 4-1in an chak a, Barca goal zawng zawng hi Messi a thun vek niin game khat chhunga goal li a thunna hmasa ber a ni. 

Kum hnih hnuah UCL last 16-ah Bayer Leverkusen 7-1 a an sawp tumin goal nga zet a thun leh bawk. Champions League chanchina goal thun tam ber Cristiano Ronaldo hnuai chiaha awmin goal 120 a thun tawh a ni. 

Goal thun tamah Barca record a siam
    Kum 24 mi chauh a nih lai March 2012 khan Granada chu 5-3 ngawtin an hneh a, hemi tum hian hat-trick siamin a tih goal hmasa berah record chelh tu Cesar Rodriguez-a goal nei 232 chu nih rual chiahin a hnua a goal 2 dang chu record a ni chhunzawm cho ta bawk a ni. 

Kum khatah goal 91 a thun 
    December 2012 Real Valladolid chu an home-ah 1-3 in Barca hian va hnehin hemi tum hian ram leh club tan calendar year chhungin goal 91 zet a thun a, kum khat chhunga goal thun tam ber a ni. 

Hemi kum hian match 69 lekah Barcelona tan goal 79 thunin a ram Argentina tan goal 12 a thun a ni. 2012 hian a thun zozai avang hian a tum li nan Ballon d'Or chawiin trophy erawh Copa del Rey chauh a chawi thung. 

La Liga-a goal thun tam ber
    November ni 22, 2014 khan Barcelona chuan 5-1 zetin Sevilla an sawp a, hemi tum hian La Liga-a goal thun tam ber record chelh mektu Telmo Zarra goal 251 chu free-kick atanga a goal thun hmanga nih rualin a khum zui nghal bawk a, he inkhelhah hian hat-trick a siam nghe nghe.

Tunah chuan Messi hian La Liga goal 474 zet neiin goal 200 chuang zetin La Liga goal thun tam record hi a khum tawh a, he record khum leh hi chu player naran tan chuan vana rah ang hial a ni ngei ang. 

Ballon d'Or 6-na a dawng
    December ni 2, 2019 khan Paris khawpuiah Messi hian football khawvel-a mimal chawimawina hlu ber Ballon d'Or chu a tum ruk nan a dawng a, player zingah dawng hnem ber a ni. Nikum hmasa khan ram leh club tan goal 54 a thun a ni. Kumin pawh hian he chawimawina dawng thei tura rin kai langsar ber pakhat a ni mek.