ZALEN, Mar. 25, 2025: Mizo hmeichhe politician, Baryl Vanneihsangi chu Federation of Indian Chamber of Commerce and Industries (FICCI) hnuaia Women’s Wing, FLO-in Annual FLO Women Achiever’s Award, 2025 a hlanah a dawng ve.

Aizawl South III bialtu MLA hnenah hian chawimawina hi Thawhtanni zan khan Taj, Vivanta Hotel, Guwahati, Assam-ah Assam Governor Lakshman Prasad Acharya-a’n a hlan.

FLO Women Achiever’s Award hi kum 10 chuang sem tawh a ni a, professional line hrang hrang huamin Mizoram atangin zaiah Mami Varte-in a lo dawng tawh a. Baryl-i hi politics dawngtu hmasa ber a ni thung.

Chawimawina a dawn chungchangah hian TV host leh radio jockey ni thin, Baryl-i chuan award dawng tura duhsakna a dawng leh hriat a lo ni ve chu thil hlu tak a nih thu a sawi a, “Hmeichhiate politics-a an tel hi intluktlanna atana a pawimawh mai a ni lo va, khawtlang nun nuam zawk leh huang neihna kailawn a nih avangin a hlu takzet a ni,” a ti.

Award semna kalte chu theihtawp chhuah zel tur leh hmeichhiate politics-a ngaihhlut leh zah an nih theihna tura mahni hmun theuha tang turin ZPM party MLA hian a chah bawk.

Baryl-i rual hian ram 67 tlawh chhuaktu Assam biker Meenakshi Das, Manipur folk singer leh sumdawnnaa hmeichhe hlawhtling takte hnenah chawimawina hlan an ni bawk.

FICCI Ladies Organisation (FLO) hi kum 1983-a din a ni a, an award sem hi chi thuma then niin Women Achiever’s Award bakah Trailblazer leh Chapter Award sem a ni.