American rock singer ropui Meat Loaf chu January 21, Zirtawpni khan kum 74 mi niin a boral. A thi thu hian khawvel a dengchhuak nghal a, amah uitu mi thahnem tak chuan sunna thu social media kaltlangin an tarlang a ni. 
Meat Loaf hi September 27, 1947 khan Dallas, Texas, U.S. ah Marvin Lee Aday tih hmingpuin a piang a, a aw tha tak a larpui. Zai bakah hian lemchan leh tv show lamah pawh a inlan nasa a, hriat a hlawh hle - Fight Club, the Rocky Horror Picture Show leh Wayne's World-ahte pawh a inlan thin a ni. 
'Bat Out Of Hell' chu...
Khawvelin Meat Loaf a hmelhriatna leh a thih hnu thlenga a hriat zuina tur chu a album 'Bat Out Of Hell' kha a ni. A debut album hit zet mai hi 1977 khan a tichhuak a,  larpui rem rem hle. Henga hlate hi 1975–1976 inkara a record niin, Bat Out of Hell II: Back into Hell leh Bat Out of Hell III: The Monster Is Loose te a tichhuak leh nghe nghe a ni. 
'Bat Out of Hell' hi khawvel huap pawha album hralh kal ber zinga mi niin, copy maktaduai 100 chuang zet hralh chhuah a ni. Recording Industry Association of America (RIAA) in a 'certified' a ni bawk. UK Albums Chart-ah kar 522 chhung zet a lang a, a ni aia record nei tha chu Rolling Stone te chauh an ni. 
Hetiang khawpa ropuik leh hriat hlawh ni mahse a hringnun zinkawngah harsatna tam tak a tawk. Meat Loaf hian 1978 khan stage-a a chet tlatnaah a ke a titliak a, Ottawa, Canada-a tour a neih pawh wheelchair atangin a khar. Pittsburgh-ah 2011 kha a chesual a, 2016 khan Canada-a concert a neih laiin vanduai thlak takin a chesual leh - kum thum hnuah Texas-ah vanduaina a tawk bawk. 
A hun laia khawvel dengchhuak khawpa rock star lar hian Zirtawpni khan a zinkawng chu a lo zawh tawp ta a ni.  

A solo album : 
Bat Out of Hell - 1977
Dead Ringer - 1981
Midnight at the Lost and Found - 1983
Bad Attitude - 1984
Blind Before I Stop - 1986
Bat Out Of Hell II - 1993
Welcome to the Neighbourhood - 1995
Couldn't Have Said It Better - 2003
Bat Out of Hell III - 2006
Hang Cool Teddy Bear - 2010
Hell In A Handbasket - 2011
Braver Than We Are 2016