Tualchhung Tinreng

Bawlhhlawh harsatna

Admin - Apr 17, 2021

Bawlhhlawh tawih thei lo hi cement company hnenah kum khatah ton 1000 hralh tura kan in beisei laiin hripui avangin kan hralh thei lo a. A tawih thei lo hi thla khatah ton 1200 te paih a nih avangin harsatna kan tawk ta a ni

Aizawl khawpui bawlhhlawh paihna thar Tuirial kama Solid Waste Management Centre ah chuan bawlhhlawh tawih thei lo a tam avangin harsatna an tawk a. Harsatna thlen chhan hi mipuiin bawlhhlawh an thliar that tawk loh avang leh hripui len vang nia thudawn a ni.

SWMC bultantu SIPMIU thawktu te chuan bawlhhlawh tawih thei ah chuan harsatna an tawk lemlo tih sawiin, mahse a tawih thei lo ah erawh mipui lamin bawlh-hlawh te dan ang taka an thliar loh avangin hmun khatah paih khawm a ngai a. Hei bakah hripui leng vanga hnathawh a khaihlak avangin harsatna an tawk niin ZALEN an hrilh. "Bawlhhlawh tawih thei lo hi cement company hnenah kum khatah ton 1000 hralh tura kan in beisei laiin hripui avangin kan hralh thei lo a. A tawih thei lo hi thla khatah ton 1200 te paih a nih avangin harsatna kan tawk ta a ni," an ti a. Tuna harsatna chu thla 2/3 hnu velah chuan chinfel theih an beisei tih an sawi bawk.

Aizawl Municipal Corporation thawktute pawhin bawlhhlawh tawih thei lo paihna hmun chu tihzauh a ngai nia an hriat thu ZALEN an hrilh bawk a. Plastic bawlhhlawh leh leitha siamna te pawh mimal kuta hlan (outsource) turin hmalak mek a ni tiin hetih lai hian hemi atan hian tumah inremna ziahpui erawh an la nei lo niin an sawi a. Sarang (plastic) chu PWD kawng siamna atan hman a remchang em tih thuah pawh PWD te nen an in dawr mek niin an sawi bawk.  

Aizawl Solid Waste Management Centre hi nuai 3799.986 senga sak a ni a, a sak hna hi ni 08.08.16 khan tan a ni. He centre hi hectare 13-a zau niin mi nuai 3.535-in an hman theih tur a sak a ni. November 2, 2020 atang khan Aizawl khawpui bawlhhlawh paihna hmun thar, Solid Waste Management Centre, Tuirial-ah hian Aizawl khawpui bawlhhlawhte paih tan a ni. SWMC hi SIPMIU bultan a niin AMC kutah an hlan tawh a, mahse a enkawl hna hi AMC leh SIPMIU chuan an la thawk dun a ni.