BBMA-ah Jonas Brother Show thlir ang

Admin - May 23, 2021

Thawhtanni zingah sem dawn

Kum tina sem thin rimawi khawvela award ngaihhlut tak pakhat Billboard Music Award (BBMA) chu May 23, 2021 hian sem a ni dawn a, India sana-ah chuan Thawhtanni zing dar 5:30-ah en theih a ni ang. 

Award ceremony hi Nick Jonas chuan a host dawn a, a nupui Pryanka Chopra chuan a tawiawm dawn bawk. Billboard Music Award 2021-ah hian BTS leh Jonas Brothers te an perform dawn a, anni bakah hian zaithiam dang eng emaw zat an inlan dawn - en hmaih chi a ni lo. 

Jonas Brothers 'show'
BBMA hi Jonas Brothers ngaisangtute tan chuan a nghah-hlelhawm khawp ang le - an perform dawn bakah an band member Nick Jonas chuan a host dawn. American band lar Jonas Brothers te hian khawvela DJ lar leh hriat hlawh berte zinga mi Marshmello thawhpuiin Zirtawpni khan hla thar 'Leave Before You Love Me' an tichhuak a, he hla hi BBMA-ah hian an perform nghal dawn niin khawthlang media te chuan an tarlang. 
Tun tumah hian Korean boyband lar BTS te an inlan dawn a, boruak nei lian ber tur zinga mi an ni. BTS hian Zirtawpni khan single thar 'Butter' an tichhuak a, hei ngei mai hi an perform nghal dawn a ni. 

BTS leh Jonas Brothers bakah hian - Alicia Keys, Bad Bunny, DJ Khaled, Doja Cat & SZA, Karol G, P!nk, The Weeknd leh Twenty One Pilots te an che dawn bawk. 
Mizoramah pawh award sem nikhuain tlema mi chal lang deuh award hlan tura sawm thin an ni a, khawthlang ramte phei chuan an chinna a rei tawh hle. Kuminah pawh BBMA presenter turte hi an hrawl leh hlawh viau dawn a, show tihmuhnawmtu pakhat an ni leh ngei dawn.    

Mit fukna tur 

The Weeknd
Billboard Music Award dawng thei tura chhawpchhuahte hming hi April 28 khan puan a lo ni tawh a, mimala langsar ber chu The Weeknd a ni. Canadian singer hi category 16 zetah award dawng thei tura chhawpchhuah a ni - a namai lo hle. Heti zo zai atang hian award engzat nge a humhaw ang tih chu hriat chakawm tak a ni, a arte lu kawn em lo ang chu! 

The Weeknd hnampui Drake chu category pasarih-ah a lang bawk a, Taylor Swift, Juice WRLD leh Pop Smoke te chu mipui mit fukna tur an ni bawk ang. 
Hetih rual hian a vawi khat nan BTS chu Top Social Artist dawng thei tura chhawp chhuah an ni bawk a, record an siam thei ang em tih chu hriat chakawm tak a ni. 

Khawnge en tur?
Award Ceremony hi NBC chuan live-in an pechhuak dawn a, NBC live streaming service 'Peacock' chuan an pe chhuak dawn bawk. Hei bakah hian online streaming service dang - Hulu, SlingTV leh fuboTV ten an pechhuak dawn bawk a, TV hma thut kher ngai loin smartphone leh tablet atang pawhin a en theih dawn a ni. 

Share now