Aizawl September 4, 2022 : Naktip, Thawhlehni hian Baptist Church of Mizoram leh Champhai Grape Growers Society chuan sacramental wine chungchangah inremna ziah an tum.

ZALEN-in Champhai Grape Growers Society hruaitute hnen atanga thu a dawn danin Memorundum of Understanding hi Champhai winery-ah ziah an tum a. Grape tui lei zat tur leh leina man zat tur chu sawiho a ni ang.

Champhai Grape Growers Society hruaitute chuan, “BCM nen inremna kan ziah lai, kum 2016 kha chuan grape rah hi kg-ah Rs. 35 atanga 40 inkarin kan lei a. Grape man hi tunah chuan kg-ah Rs. 60 a nih tawh bakah bottle man pawh a to tawh avangin tihsan a ngaih ka ring a. BCM hotute nen hian kan sawi tlang ang a, kan hlohna tur chuan inremna min siampui ka ring lo a ni,” a ti.

Champhai Grape Growers Society hruaitute sawi danin Covid-19 vanga inkhawm a theih loh avangin sacramental wine mamawhna pawh a tlahniam a; mahse, tunah erawh nunphung a pangngai leh tak avangin mamawh hi a san chhoh leh an ring tih an sawi a. Grape rah pawh lei chhunzawm zel an tum tih Zalen an hrilh bawk.