Aizawl: AH&Vety Minister Dr. K.Beichhua chuan Zirtawpni khan Siaha district chhunga sawrkar office hrang hrangte leh sawrkar thar hmalakna tur hmunhmate a tlawh kual.   Dr.Beichhua in Sawrkar office a tlawh te chu Social Welfare, Police, ICDS te a ni a. Sawrkar office-te a tlawh mai bakah hian New Siaha VC Area huam chhunga playground siamna tur hmun te, Tlahpi hmuna SGWSS tuilakna catchment Area leh tuihnar te a tlawh a. Siaha Helipad (Dropping Zone) atangin Drone hmangin Eklavya Model Residential School dinna tur hmun Aereal Survey te neih a ni.   Minister hian Circuit House-ah Mizoram sorkar hnuaia Head of Office te meeting a neihpui bawk a, thu sawiin, “Mahni awmna post sawisela iak iakte leh pawisa tamna post emaw, file mawm zawk emaw melh reng renga phusa sawrkar hnathawk reng reng mi vanduai, mi khawngaihthlak leh mi hlim lo, an rawngbawlsak mipui leh sawrkar tan pawha mi hnawksak an ni thuai thin a ni,” a ti.   ‘Siaha district chhunga ka awm chhung hian district tan leh mipuite tan hian rotling leh chhenfakawm thil eng emaw tal ka han hnutchhiah te ang,’ tih rilru pu vek tura a beisei thu a sawi.