Premier League-a an match hnihna khel turin zanin tlai dar 6:30 hian Manchester United chu Southampton mual St Mary’s Stadium-ah an leng lut dawn. Kar hmasa khan an game khat khelhnaah United hian an mual Old Trafford-ah Leeds United 5-1 in an sawp a, table-ah pakhatna an ni mek. Kha inkhelhah khan an chetthat em avang khan Ole Gunnar Solskjær leh a naute hi St Mary lamah pawh hian inringtawkna an ngah hlein a rinawm. Kha inkhelhah khan United chuan an khel tha hle a, a bik takin Bruno Fernandes a chetha hle a, hat-trick siamin Paul Pogba pawhin assist pali zet a nei a nih kha. Southampton thung hi Everton lakah 3-1 in an tlawm thung. An result hnuhnung en ngawt chuan United hi chungnung zawk tura ngaih an ni.

Southamton leh Manchester United hi Premier League-ah tum 44 zet inhmachhawn tawhin, Red Devils hian tum 28 hneh tawhin Saint hi vawi 7 an chak tawh thung. United hian goal 96 thun tawhin Southamton hian goal 50 an thun tawh thung. Southamton lam hian clean sheet 6 neiin United hian 12 an nei thung. February thlaa an intawn hnuhnun ber tumin United hian 9-0 zeta sawpin Premier League-a an hnehna sang ber a ni phak hial a, 1995 khan United hian Ipswich 9-0 zetin an sawp tawh bawk. 

Team pahnih khaikhin chuan Southampton hi bet zawk tura ngaih an ni a, United lakah hian an home league 10 zetah chak hmel hmu tawh lovin tum 6 tlawmin tum 4 chu an draw ve a ni. Premier League game 26 chhung zet chu United hi tlawm lovin English top-flight history an lo siam ve tawh ngat a ni.

Anni bakah hian zanin dar 9 hian champion rin kai phak Chelsea chu Arsenal mual Emirates Stadium-ah an leng lut dawn a, zanlai dar 12:30 ah West Ham leh Leicester City an inkhel bawk ang.