Zirtawpni zan zanlai khan Italy chuan Euro 2020 semi-final luttur zawnnaah FIFA ranking number 1 Belgium 2-1 in Munich khawpuiah an hneh. Semi-final ah Swidzerland hnehtu Spain an hmachhawn ang.

Team tha pahnih inkhel hmuhnawm takah hian second round angin goal a lut tam lo a, minute 31 naah Barella chuan Italy hmahruaina goal a khung a, minute sawmpahnihna lekah Barella siamsak hmangin Italy tana goal hnihna Insigne chuan a thun ve le. 
Inkhelh hma boruak

An khelh tawh dan enin Italy hi tun tournament chhunga team tha ber pawla ngai an awm nual.  An bitum tur Belgium lah Golden generation hmang mek, FIFA ranking number 1 nihna chelh mektu anlo nih bawk avangin, an inkhelh hma hauhin boruak an nei lian sa hle. 

Inkhelh a goal hnih neitu Azzurri team hi tun hnaiah an chetha hle a, game 13 zet chak zawn tawhin game 32 chhung chu chak loh nei lovin an kal tluang mek a, an record en chuan Roberto Mancini hnuaiah hian team tha tak an din tih chu a hriat.

Tun hma record en pawhin Belgium hian Tournament lian thamah Italy hi an la hneh ngai lo a, an inkhelh hnuhnun vawi 4-ah Italy hi vawi thum an chak bawk vangin Belgium lamin an chelh ding zolo pawh hi thil mak tia sawi hlui tur chu a ni hran lo. 
Manchni naute ropuina a zual zel

Roberto Mancini a enkawl Azzurri team hian, inkhelhah hian an thiamna an pholang tihloh rual a ni lo. First half khelh chhung ringawt pawhin an team thawhhona that zia leh an hmachhawn te tana beih let an har zia an lanchhuah tir zing hle a, Belgium defender te manganna siamin leh semi final lut turin Nicolo Barella leh Lorenzo Insigne te hmangin goal hnih an thun thei a ni. 

Belgium an duai bik lo
    Ball khawih tamah chungnung zawk lo mahse, goal shot vawi 10 zet nei thei Belgium lam hi goal-ah an hlauhawm thei hle a, tum 4 zet chu an pet goal teuh hle. Mahse, Azzurri keeper tha Gianluigi Donnarumma vanneih zan an tawng hlauh a, goal an thun lo hlauh a tih theih awm e. 

Hun bul lama minute 20-na bawr vela Kevin de Bruyne-a shot tha zet leh counter-attack hmanga an nawr let tum a, Romelu Lukaku-a te goal shoot tha zet pahnih alo dan sak phei chu ropui tak a ni. 

Inkhel hmuhnawm chu
Record nei duap zawk Belgium lamin an team tumte tha hle mah se tum dang angin mual chhungah dawl zawra zawr ngawt tum tawh  bik lo. 

Inkhelh tan a ni a, boruak a tang nghal. Minute 10 lek a kal tihin Italy lamin free kick an hlawh chhuak a, ball tha zeta rawn thlawk phei chu Giovanni Di Lorenzo-a’n lo dang pialin  Chiellini chuan a awmin a lo sut luh a, mahse VAR hmanga an en hnuah offside tiin goala pawm a ni lo.  Chu thutlukna chuan Italy player te phurna a tih nep phah lo. 

Team te innawr tawn zak zak karah, minute 31-naah team pahnih te danglamna a rawn thleng ta, Marco Verratti-a’n ball changin Barella tan ball pe phei a, hmun chep tak kar atangin Barella chuan Italy goal khatna a rawn thun. Hma hruaitu zawk mahnise, Italy lamin tha an thlah nghal nawt lo. Minute sawmpahnihnaah Italy bawk chuan an goal hnihna an khung belh. Goal hmasa khungtu Barella chuan Lorenzo Insigne ball pein,  a veilamah ball a la lut phei a, mawi zeta khalh kualin Belgium defender te chhaih buai hman lohvin box pawn D line pawn hret atangin mawi zetin an goal hnihna a chhuih lut. Italy-in 2-0 in hma an hruai ta.

First half tawp dawn added time-ah Belgium vanneihna a rawn thleng ve ta. Italian fullback Di Lorenzo-a’n box kil chhungah Jeremy Doku-a ball khalh lut tur chu a lo paltlu a, VAR hmanga referee-in a en hnuah penalty tiin thutlukna a siam, Belgium striker palian Romelu Lukaku rawn pen chhuakin, Doku-a penalty hlawhchhuah chu rawn petin goal-ah a chan tira, first half chu 2-1 in  a tawp ta. Mahse, hun tawp thlengin goal a luh belh lova, Lukaku-a goal khat chauh chu Belgium semi-final luhna turin a tawk zo ta lo a ni.